ახალციხის მუნიციპალიტეტის გამგეობაში ერთ კვირაში საკადრო ცვლილებები დაიწყება

ახალციხის მუნიციპალიტეტის გამგებელი ზაზა მელიქიძე, დღეს, 14 ივლისს, ვიდრე ახალციხის მუნიციპალიტეტის ახალი მოწვევის საკრებულოს სხდომა მიმდინარეობდა, გამგეობაში სამუშაო პროცესს გაეცნო და ყველა კაბინეტი დაათვალიერა.

მელიქიძე ახალციხის მუნიციპალიტეტის გამგებლის კაბინეტს დაიკავებს, ახალციხის მუნიციპალიტეტის საკრებულოს თავმჯდომარის ოთახი კი ახალციხის მერს გია კოპაძეს დაეთმობა. მელიქიძის განცხადებით, ვიდრე მერიის შენობა გარემონტდება, გამგეობა და მერია ერთ შენობაში იმუშავებს.

მისივე განცხადებით, ერთ კვირაში საკადრო ცვლილებებიც განხორციელდება: „ჩვენ ყველა პოსტზე ღირსეულ პიროვნებებს წარვადგენთ“.
რაც შეეხება კითხვას იმის შესახებ, თუ ვინ იქნებიან მისი მოადგილეები, გვპასუხობს: „ეს საკითხი ჯერ განხილვის სტადიაშია, საბოლოოდ შევჯერდებით და მათი ვინაობის შესახებ ცნობილი ერთ კვირაში გახდება“.

მელიქიძე აცხადებს, რომ ყველა დაწყებულ პროექტს გააგრძელებს: „ასევე, უფლებამოსილების მიღებისთანავე ვიზრუნებთ საბავშვო ბაღებში სასწავლო პროცესის აღდგენაზე. პრობლემა ბევრია, თუმცა, ისეთი არცერთი, რომ გადაჭრა შეუძლებელი იყოს“.

[თამუნა უჩიძე, ახალციხე]