ადიგენში საკადრო ცვლილებები დაიწყო

ადიგენის მუნიციპალიტეტის გამგებლის პირველ მოადგილედ მინდია ჯელია დაინიშნა.

ამ დროისათვის შეცვლილია რამდენიმე სამსახურის უფროსი და სამსახურის სპეციალისტები.

ადმინისტრაციული სამსახურის უფროსად დავით ტაბატაძე დაინიშნა, რომელიც მანამდე ეკონომიკისა და ინფრასტრუქტურის განვითარების სამსახურში მუშაობდა.

საფინანსო–საბიუჯეტო სამსახურის უფროსად ვაჟა მერაბიშვილი დაინიშნა, რომელიც მანამდე ტერიტორიული ორგანოს რწმუნებული იყო. ამავე სამსახურში მთავარი სპეციალისტის პოსტი, ბიუჯეტის დაგეგმვისა და ფორმირების საკითხებში, სოფო გიქოშვილმა დაიკავა.

სამხედრო აღრიცხვის, გაწვევისა და მობილიზაციის სამსახურის უფროსად ავთანდილ ჩხიტუნიძე დაინიშნა; სამხედრო–სამაშველო სამსახურის უფროსად კი ავთანდილ ძაძამია;

ეკონომიკისა და მდგრადი განვითარების სამსახურის უფროსად ისევ გოდერძი სხირტლაძე დარჩა. ამ სამსახურში ცვლილება სპეციალისტის პოსტს შეეხო ბუნებრივი რესურსების სარგებლობის საკითხებში, ამ ადგილზე ჯაბა ენუქიძე დაინიშნა.

კულტურის, ძეგლთა დაცვის, ახალგაზრდულ საქმეთა, ვეტერანთა, ლტოლვილთა და იძულებით გადაადგილებულ პირთა სამსახურის უფროსის პოსტი ამ დრომდე ვაკანტურია.

ადიგენის მუნიციპალიტეტის გამგებელი ზაქარია ენდელაძე განმარტავს, რომ საკადრო ცვლილებები ამით არ დასრულებულა.
მისი თქმით, იგეგმება ორი სამსახურის დამატება, იურიდიული და შესყიდვების სამსახურის.

„დაგვჭირდება სამსახურის ხელმძღვანელების და თანამშრომლების დამატებაც. გამგეობაში შესყიდვების სამსახური ცალკე არ იყო, უბრალოდ სპეციალისტები მუშაობდნენ“, – განმარტავს გამგებელი.

[თინათინ ზაზაძე, ადიგენი]