ჯიმშერ გოგოლაური: საკრებულოს თავმჯდომარეს ერთ აქციაში მაინც უნდა მიეღო მონაწილეობა

გოგოლაურის განცხადებით, სირცხვილია, როდესაც ქალაქის საკრებულოს თავმჯდომარე ისე ინიშნება ამ პოსტზე, რომ თავის დროზე ხელისუფლების შეცვლაში მონაწილეობა არ მიუღია.

"საკრებულოს თავმჯდომარეობას რომ ითხოვ, უნდა გეკუთვნოდეს. ერთ აქციაში მაინც უნდა მიგეღო მონაწილეობა", – მიმართა ჯიმშერ გოგოლაურმა კახა ბერიძეს მას შემდეგ, რაც იგი საკრებულოს თავმჯდომარედ აირჩიეს.

გოგოლაურმა გააპროტესტა საკრებულოს თავმჯდომარის პოსტზე "რესპუბლიკელი" თამარ გოგოლაძის კანდიდატურის დასახელებაც.

"წელიწადი და რვა თვე მთავრობაში იყავი, მაგრამ ქალაქისთვის არაფერი გაგიკეთებია", – მიმართა გოგოლაურმა გოგოლაძეს მას შემდეგ, რაც მისი კანდიდატურა დაასახელეს.

"ნუთუ ღირსეული ვერ ვნახეთ ვერავინ, რომ საკრებულოს თავმჯდომარედ და მოადგილედ აგვერჩია?" – მიმართა გოგოლაურმა დეპუტატებს.

"ქართული ოცნების" დეპუტატებმა გოგოლაურს სთხოვეს პოლემიკა შეეწყვიტა: "ამაზე შემდეგ ვისაუბროთ", რაზეც გოგოლაურმა განაცხადა, რომ მას მხოლოდ პოზიციის დაფიქსირება სურდა.

11 ხმით 3–ის წინააღმდეგ საკრებულოს თავმჯდომარის მოადგილედ უკვე აირჩიეს თამარ გოგოლაძეც. ჯიმშერ გოგოლაურმა კენჭისყრაში მონაწილეობა არ მიიღო.



[sknews.ge]