კახა ბერიძე: 'სხვების მსგავსად პარტიიდან პარტიაში არ მირბენია'

დღეს, 14 ივლისს, პირველი მოწვევის საკრებულოს სხდომაზე თვითმმართველი ქალაქის ახალციხის საკრებულოს თავმჯდომარე კახა ბერიძე აირჩიეს.

ბერიძის არჩევა საკრებულოს დეპუტატმა „ნინო ბურჯანაძე – ერთიანი ოპოზიციიდან“ ჯიმშერ გოგოლაურმა გააპროტესტა. გოგოლაურის განცხადებით, ადამიანი, ვინც ამ პოსტზე პრეტენზიას აცხადებს, მინიმუმ ერთ აქციაზე მაინც უნდა მდგარიყო და წვლილი შეეტანა ხელისუფლების შეცვლაში.

კახა ბერიძემ „სამხრეთის კარიბჭესთან“ განაცხადა, რომ გოგოლაურის ეს განცხადება „მასაც მოხვდა ყურში“: „წარმოშობით ასპინძიდან ვარ, სკოლაც იქ დავამთავრე, მაგრამ ჩემი აქტიური ცხოვრება, მას შემდეგ რაც სამეციდინო უნივერსიტეტი დავამთავრე, 1995წლიდან მოყოლებული ახალციხეს უკავშირდება. თითქმის 20 წელიწადი ვიმსახურე სხვადასხვა სამსახურებში, სად ვიყავი მანამდე? ვაკეთებდი ჩემს საქმეს, იმას, რაც მევალებოდა და ვფოქრობ, რომ წესიერად ვასრულებდი ამ ყველაფერს“.

რაც შეეხება გოგოლაურის განცხადებას იმის შესახებ, რომ ხელისუფლების შეცვლაში მონაწილეობა არ მიუღია, საკრებულოს თავმჯდომარე ამბობს, რომ თავისი საქმით იყო დაკავებული: „ვიყავი დაკავებული სოციალური და ჯანდაცვის პრობლემებით. მიმაჩინია, რომ სადაც ხარ, იქ უნდა აკეთო შენი საქმე კარგად. სხვებისგან განსხვავებით, აქეთ–იქეთ, სხვადასხვა პარტიაში არ მირბენია, მიუხედავად იმისა, რომ ბევრი სახელმწიფო სამსახური გამოვიარე“.

რაც შეეხება „ქართულ ოცნებასთან“ კავშირს, კახა ბერიძე ამბობს, რომ ბოლო წლებში თბილისში მუშაობდა და შეთავაზება, პარტიის წევრი გამხდარიყო, იქ მიიღო.

ახალციხის საკრებულოს ახალარჩეული თავმჯდომარე ამბობს, რომ ამ პოსტზე მისი დასახელება მოულოდნელი არ იყო: „ამ თემაზე კონსულტაციები გავიარეთ და რა თქმა უნდა ველოდი. უკვე გათავისებული გვაქვს ის, თუ რას უნდა შევეჭიდოთ და რა უნდა გავაკეთოთ“.

ქალაქის მთავარ პრობლემებად იგი გაუმართავ წყალ–საკანალიზაციო სისტემას, ჯანდაცვის სფეროსა და ქალაქის დასუფთავების პრობლემას ასახელებს. ამბობს, რომ მართალია საყოველთაო დაზღვევა მოქმედებს, მაგრამ ამ კუთხით მუშაობას ქალაქის საკრებულოშიც გეგმავენ: „გვინდა, მივეხმაროთ მოქალაქეებს“.

რაც შეეხება საკადრო ცვლილებებს, საკრებულოს თავმჯდომარე ამბობს, რომ ცვლილებები იქნება.

„ახალი ორგანული კანონით საკრებულოს თავისი ფუნქციები ფაქტობრივად ყველაფერი დარჩა. საკრებულოს აპარატი ძალიან მცირე შტატია, კომპაქტური და საქმიანი დარჩებიან ძველებიც და იქნებიან ახლებიც, ახალი სახეებიც“, – ამბობს კახა ბერიძე, რომელიც თვითმმართველი ქალაქის ახალციხის საკრებულოს თავმჯდომარის პოსტზე დღეს, 14 ივლისს, 15 დეპუტატმა 11 ხმით აირჩია.

[თამუნა უჩიძე, ნინო ნარიმანიშვილი, ახალციხე]