იურიდიულ საკითხთა კომიტეტის თავმჯდომარე გელა პეტაშვილი გახდა

გელა პეტაშვილი ქალაქ ახალციხის მუნიციპალიტეტის საკრებულოში კულტურის, განათლების, სპორტის და ახალგაზრდულ საქმეთა კომისიას ხელმძღვანელობდა. 26 დეკემბერს საკუთარი განცხადების საფუძველზე უფლებამოსილება მოიხსნა. 29 დეკემბერს კი პეტაშვილი დეპუტატებმა ფარული კენჭისყრით, იურიდიულ საკითხთა კომიტეტის თავმჯდომარედ აირჩიეს.

გელა პეტაშვილის კანდიდატურა საკრებულოს წევრებმა თამარ გოგოლაძემ, მამუკა მიქელაძემ და სამველ ოვეიანიმა დაასახელეს. „ნინო ბურჯანაძე – გაერთიანებული დემოკრატების“ წევრმა ჯიმშერ გოგოლაურმა განაცხადა, რომ გელა პეტაშვილის კანდიდატურას მხარს არ დაუჭერდა.

„რა აზრი აქვს სხვა კანდიდატურის წარდგენას, როგორც ხდება ხოლმე, ესეც წინასწარ შეთანხმებულია. იურისტები სხვებიც არიან ამ საკრებულოში და შეიძლებოდა რომელიმეს დანიშვნა“, – განაცხადა ჯიმშერ გოგოლაურმა.

პეტაშვილამდე ეს პოზიცია ‘თავისუფალი დემოკრატების’ წევრს, შალვა გოგოლაძეს ეკავა. თუმცა, 21 დეკემბერს იგი თავმჯდომარეობიდან გადააყენეს. გოგოლაძე ირაკლი ალასანიას პარტიაში რჩება, იგი ფიქრობს, პოლიტიკური მოტივით გაათავისუფლეს.

ამავე საკრებულოს სხდომაზე აირჩიეს კულტურის, განათლების, სპორტისა და ახალგაზრდულ საქმეთა კომისიის თავმჯდომარეც. ფარული კენჭისყრით, აღნიშნულ პოზიციაზე, 10 ხმით და სამის წინააღმდეგ დავით ლომიძე აირჩიეს.

[მანანა სარაშვილი, ახალციხე]