დეპუტატი მერის წინააღმდეგ – გოგოლაურმა ამჯერად სასამართლოს მიმართა

ჯიმშერ გოგოლაურმა ახალციხის რაიონულ სასამართლოს დღეს, პირველ თებერვალს მიმართა. გოგოლაურმა სასამართლოში სარჩელის შეტანა მას შემდეგ გადაწყვიტა, რაც პროკურატურში განუმარტეს, რომ საქმე, რომლზეც დეპუტატი მერს ედავება, სამოქალაქო დავას მიეკუთვნება.

„ერთიანი დემოკრატიული მოძრაობის“ სამცხე–ჯავახეთის რეგიონული კოორდინატორი ჯიმშერ გოგოლაური ქალაქის მერს გიორგი კოპაძეს მძიმე ბრალდებაში ცრუ დასმენას ედავება.

„გიორგი კოპაძემ სერიოზული მორალური ზიანი მომაყენა, მან ჩემი რეპუტაცია შელახა“, – აცხადებს დეპუტატი.

გოგოლაური ქალაქის მერისგან საჯაროდ, ტელეკომპანია „მეცხრე არხისა“ ასევე საინფორმაციო სააგენტო „სამხრეთის კარიბჭეს“ საშუალებით ბოდიშის მოხდას მოითხოვს.

შეგახსენებთ, ახალციხის მერმა, გიორგი კოპაძემ ტელეკომპანია მეცხრე არხის გადაცემა "დიალოგში" განაცხადა, რომ „როცა გოგოლაური პოლიციის თანამშრომელი იყო, პატიმრებს ბოთლებზე სვამდა“.

ამ განცხადებას გოგოლაურის მხრიდან პროტესტი და პროკურატურაში სარჩელის შეტანა მოჰყვა. გოგოლაურმა პროკურატურას 11 დეკემბერს მიმართა. პროკურატურამ საქმეზე გამოკითხვებიც დაიწყო თუმცა, საქმის წარმოება აღარ გააგრძელა იმ მოტივით, რომ ეს სამოქალაქო დავაა.

[ვარლამ წიკლაური, ახალციხე]