ჯიმშერ გოგოლაური ურბანული დაგეგმარების კომისიის თავმჯდომარეს დაუპირისპირდა

აღნიშნულის შესახებ გოგოლაურმა, 29 იანვარს საკრებულოს სხდომაზე განაცხადა.

„გაერთიანებული დემოკრატიული მოძრაობის“ დეპუტატის, ჯიმშერ გოგოლაურის თქმით, ურბანული დაგეგმარების კომისიის თავმჯდომარე სამველ ოვეიანი ანაზღაურებას დაუმსახურებლად იღებს და ამიტომ კომისიის თავმჯდომარის პოსტი უნდა დატოვოს. მისი თქმით, გასული, 2015 წლის განმავლობაში ოვეიანს არცერთი სხდომა არ აქვს ჩატარებული.

„დაინიშნოს ისეთი ადამიანი, რომელიც საქმეს გააკეთებს“, – ამბობს ჯიმშერ გოგოლაური, რომელიც ამავე კომისიის წევრია.
მისი თქმით, ოვეიანი რამდენჯერმე გააფრთხილა, რომ სხდომა ჩაეტარებინა, თუმცა უშედეგოდ: „შემპირდა, მაგრამ მთელი წელი ისე გავიდა, არაფერი გაუკეთებია“.

გოგოლაურის ბრალდებების შესახებ კომენტარი არ გაუკეთებია კომისიის თავმჯდომარეს სამველ ოვეიანს. საკრებულოს თავმჯდომარე დავით ლომიძე კი აცხადებს, რომ ოვეიანი სხდომებს ნამდვილად ატარებდა.

„გოგოლაური არ მონაწილეობდა სხდომებში“, – ამბობს დავით ლომიძე.

ატარებდა თუ არა სამველ ოვეიანი სხდომებს, „სამხრეთის კარიბჭემ“ საკრებულოს აპარატში გადაამოწმა. აპარატში გვითხრეს, რომ სხდომები ნამდვილად ტარდებოდა, თუმცა, რა პერიოდულობით, ვერ დაგვიკონკრეტეს.

„გოგოლაური წინა წლების შესახებ საუბრობს. ძალიან სასწრაფო ინფორმაციები მაქვს გასაგზავნი, ცეცხლზე ვზივარ“, – განაცხადა სატელეფონო საუბარში თამარ აბულაძემ.

ჯიმშერ გოგოლაურის გარდა, ურბანული დაგეგმარების კომისიის წევრები არიან „ერთიანი ნაციონალური მოძრაობის“ დეპუტატი ზურაბ სადათიერაშვილი და „ქართული ოცნების“ წევრი, საკრებულოს თავმჯდომარე დავით ლომიძე.

„ერთ სხდომას ნამდვილად დავესწარი, დანარჩენი არ მახსოვს“, – განაცხადა ზურაბ სადათიერაშვილმა.

[თინათინ ზაზაძე, ახალციხე]