ახალქალაქში ზამთრისთვის უკვე ემზადებიან

ზაფხულის ამ ორი თვის განმავლობაში ჩვენი მაღალმთიანი მუნიციპალიტეტის მოსახლეობამ საბოლოოდ მაინც ვერ გაიგო, გარეთ როგორი ამინდია. ხან მზე აცხუნებს, ხან კი ღამღამობით თავსხმა წვიმაა მეხითა და ჭექა-ქუხილით. ტემპერატურა მერყეობს და ზოგჯერ 130C-ზეც კი ჩამოდის. ასეთი ამინდი ხალხს აფიქრებინებს, რომ ზამთარი მაინცდამაინც შორს არაა და სათბობზე ზრუნვა ბევრმა უკვე დაიწყო.

არმინე განდილიანის ოჯახში ზამთრის გახსენებაზე შფოთვას იწყებენ. დიასახლისს შეშის ყიდვა უკვე უნდა, მაგრამ ჯერჯერობით ამის საშუალება არ გააჩნიათ.

- “რუსეთიდან ფულს როგორც კი გამოგზავნიან, მაშინვე შეშის შესაძენად წავალ. ახლა ყიდვა ჯობს, ვიდრე შემოდგომაზე, რადგან უფრო ნაკლებსაც გადავიხდი და უფრო მშვიდად ვიქნები. წელს ალბათ შარშანდელზე მეტს ვიყიდით, რადგან გასული ზამთარი ძალიან დიდხანს გაგრძელდა და შეშა შუა ყინვებში გაგვითავდა. იძულებული გავხდით ახლადმოჭრილი, ცუდად გამშრალი შეშა გვეყიდა, რომელიც ძლივს იწვოდა”, - ამბობს სოფელ კულიკამის მკვიდრი არმინე განდილიანი.

ბევრისთვის შარშანდელი სიტუაცია შეშასთან დაკავშირებით ჭკუის სასწავლებელი აღმოჩნდა. მაშინ შეშის ბაზარზე დეფიციტი იყო, ფასები მუდმივად იზრდებოდა, გარეთ კი საშინელი ყინვა იდგა. შარშან შეშის ფასი ერთ რიგზე 400 ლარიდან იწყებოდა. ერთი რიგი დაახლოებით 4-5 კუბური მეტრია.

- “წელს ვიფიქრეთ, რომ შეშა ზაფხულში ვიყიდოთ, რათა შარშანდელივით არ მოგვივიდეს, როცა ძვირიც იყო და არც იშოვებოდა. თუმცა ფასები მაინც სხვადასხვა აღმოჩნდა. ერთი თვის წინ ერთი რიგი 350 ლარად ვიყიდეთ და მაინც სხვებზე ძვირის გადახდა მოგვიწია”, - ამბობს რიმა ტოროსიანი ახალქალაქიდან.

დღეს შეშის 1 კუბური მეტრი 80 ლარი ღირს, ოჯახი ზამთრის განმავლობაში საშუალოდ 10 კუბურ მეტრ შეშას წვავს.

მოსახლეობა შეშას უკვე იმარაგებს, მიუხედავად ამისა, შეშის გამყიდველები უკმაყოფილონი არიან.

- “ბევრი გაზზე გადადის, არის სოფლები, სადაც გამხმარი ნაკელით თბებიან. გაზის ან შეშის ფული ხომ ყველას არ აქვს. შემდეგ წელს შეშა ალბათ აღარც გაიყიდება. გაზი ძვირია, თუმცა, არც შეშა უჯდება ხალხს იაფი”, - ამბობს შეშის გამყიდველი ოთარ ბერიძე.

ბუნებრივი გაზს ბევრი ამჯობინებს, თუმცა, ახალქალაქის მუნიციპალიტეტში სახლები ჯერ მაინც უმეტესად შეშით თბება. ახალქალაქის მუნიციპალიტეტში შეშა კიდევ დიდხანს იქნება საჭირო, რადგან ბუნებრივი აირი ყველა სოფელში არ არის და არც ყველას აქვს გაზის სახლამდე გაყვანისა თუ ძვირადღირებული გათბობის სისტემების ან გაზის ღუმელების შეძენის საშუალება.

- “შეშის საყიდელი ფული არ მაქვს, არც ის ვიცი, როდის მექნება. სხვა ალტერნატივა კი არ არის. რასაკვირველია, ჩვენს სოფელში ბუნებრივი აირი შემოყვანილია, მაგრამ ჩვენ არც სახლამდე მოყვანის, არც ყოველთვიურად მისი გადასახადის გადახდის საშუალება არ გაგვაჩნია”, - ამბობს სოფელ დილისკას მცხოვრები მნაც გაბრიელიანი.

ახალქალაქის მუნიციპალიტეტში ზამთარზე ზრუნვას მანამ იწყებენ, სანამ ჰაერი ზაფხულის მზით კარგად გათბება.

[ქრისტინა მარაბიანი, ახალქალაქი]