ნინოწმინდაში ტრადიციული საწვავით გათბებიან

თუ ადრე ნინოწმინდაში შეშისა და წივის გარდა (ქვანახშირს სათბობად ცოტა იყენებდა) ალტერნატიული სათბობი არ არსებობდა, ახლა ნინოწმინდელებს და ახლომდებარე სოფლის მცხოვრებლებს ბუნებრივი აირით გათბობის საშუალება აქვთ. თუმცა, უმრავლესობას ამის ფინანსური სახსრები არ გააჩნია.

“გაზი კარგია, მაგრამ ფული არ არის. სამი მანქანა შეშა ვიყიდეთ და დაგროვილ წივასთან ერთად მთელი ზამთარი გვეყოფა. გაზის შემოყვანის საშუალებაც თუ მოგვეცემა, კარგი იქნება”, - ამბობს სრბუი ჰოვჰანნესიანი.

ნინოწმინდის მცხოვრებმა იუხაბერ პოღოსიანმა ჯერ არ იცის, ზამთარში რითი გათბება, მაგრამ თუ შესაძლებლობა ექნა, ბუნებრივ აირს აირჩევს.
“ცენტრალური გათბობის ძველი სისტემა გვაქვს და სახლს ამ სისტემით შეშაზე ან ქვანახშირზე ვათბობთ. თუ გაზით გათბობის სისტემის ყიდვას მოვახერხებთ, რასაკვირველია, გაზით გავთბებით”, - ამბობს იგი.

სტეფან არზუმანიანის გამთვლებით, გაზით გათბობა გაცილებით იაფი და ეფექტურია.

“გაზი უნდა გავიყვანოთ, რადგან სახლი დიდია და მთლიანად უნდა თბებოდეს. შარშან საწვავისთვის დაახლოებით 1800 ლარი დავხარჯეთ. დავითვალეთ, რომ თუ გაზს ჩავრთავთ, მართალია, პირველი წელი რთული იქნება, რადგან სისტემის გაკეთებაა საჭირო, მაგრამ მომდევნო წლებში ამ ხარჯს ავინაზღაურებთ. გათბობა ნაკლები დაგვიჯდება და უფრო სუფთაც იქნება. ამ წელს გაზით პირველად გავთბებით და ვნახავთ, რა იქნება”, - ამბობს იგი.

ნინოწმინდაში გათბობის სეზონი უკვე დაიწყო და მინიმუმ შვიდი თვე გაგრძელდება. ღუმელების აღება მხოლოდ ივნისში იქნება შესაძლებელი. იმის გამო, რომ ბოლო წლებში შეშა საგრძნობლად ძვირდება, ბევრისთვის წივა ერთადერთი სათბობი საშუალებაა.

“გაზი არ გვაქვს. სამაგიეროდ შინაური საქონელი გვყავს, რომლის ნაკელსაც ვახმობთ და ზამთარს ასე გადავიტანთ. არც შეშის საყიდელი ფული გაგვაჩნია და არც სახლში გაზის შემოყვანის. რაც შეგვიძლია, იმას ვაკეთებთ ზამთარში გასათბობად”, - ამბობს მამიკონ ღალიჯიანი.

[აღუნიკ აივაზიანი, ახალქალაქი]