ახალციხეში იკვლევენ ვინ თბება შეშის ღუმელით

ახალციხის რწმუნებულის დავით სამსონიძის თქმით, სამცხე-ჯავახეთის სატყეო-სამმართველოს არაგაზიფიცირებული ოჯახების სიები უკვე გადაუგზავნეს. ქალაქში ასეთი 1300 ოჯახია. ახლა დამატებით სიებს ადგენენ.

„გადავეცით ეს სიები და ვისაც არ ჰქონდა გაზი შეყვანილი, იმ ხალხისთვის უნდა გამოყოფილიყო ქვითრები, რომ შეშა მიიღონ. არსებობენ ისეთი ოჯახები, რომლებსაც აქვთ გაზი შეყვანილი, მაგრამ გათბობა ვერ დაამონტაჟეს და მაინც შეშით თბებიან. ახლა სწორედ ასეთი ოჯახების აღრიცხვა გვთხოვეს“, - განმარტავს რწმუნებული.

სამსონიძის თქმით, კარგი იქნება თუ ვინც გაზიფიცირებულია, თუმცა, მაინც შეშით თბება, გამგეობას მიმართავს. შედგება დამატებითი სია, რომელსაც გამგეობა სატყეო დეპარტამენტს გადასცემს.

[თამარ თოთაძე, ახალციხე]