ახალციხის რაიონულმა სასამართლომ საიას სარჩელი არ დააკმაყოფილა

ჯეირანაშვილმა გადაწყვეტილება დღეს, 21 ივნისს გამოაცხადა. მან ახალგაზრდა იურისტთა ასოციაციის წარმომადგენლის მაია გრძელიშვილის სარჩელი არ დააკმაყოფილა.

როგორც ჯეირანაშვილმა სასამართლო დარბაზში განმარტა N28, N29, N30 და N32 უბნებზე შემაჯამებელ ოქმებში ბალანსი სწორი იყო და ამიტომ მისი ხელახლა გადათვლა დაუსაბუთებელია.

გაასაჩივრებს თუ არა საია ახალციხის რაიონული სასამართლოს გადაწყვეტილებას ჯერ უცნობია.

N37 ახალციხის საოლქო საარჩევნო კომისიის დროებითი წევრი „კონსერვატიული პარტიიდან“ სალომე ყულჯანიშვილი მიიჩნევს, რომ საუბნო საარჩევნო კომისიის წევრების მიერ დაშვებული შეცდომები, სავარაუდოდ ტრენერის ბრალია: „ის შეცდომები, რაზეც დღეს სასამართლოშია დავა, მასიურია. არ შეიძლება ერთი და იგივე სახის შეცდომა იყოს არა ერთ უბანზე, ალბათ ეს ტრენერმა ვერ აუხსნა საუბნო კომისიის წევრებს კარგად“.

შეგახსენებთ, რომ საია N28, N29, N30 და N32 უბანების შემაჯამებელ ოქმებში არსებული ხარვეზების გამო, ამ უბნების შედეგების ხელახლა გადათვლას ითხოვდა.

[თამუნა უჩიძე, ახალციხე]