საია ასპინძის საოლქო საარჩევნო კომისიას სასამართლოში უჩივის

N39 ასპინძის საოლქო საარჩევნო კომისისაში სულ ოთხი საჩივარი შევიდა აქედან სამი „ახალგაზრდა იურისტთა ასოციაციიდან“, ხოლო ერთი „ევროპული საქართველოდან“ იყო. ყველა მათგანი ასპინძის საოლქო საარჩევნო კომისიამ 23 ოქტომბერს განიხილა.

საიას გორის ოფისის ხელმძღვანელი ქეთი ბებიაშვილი "სამხრეთის კარიბჭესთან" განმარტავს, რომ N4 უბანზე 50 ბათილი ბიულეტენი აღმოჩნდა, რაზეც ორგანიზაციამ ასპინძის საოლქო საარჩევნო კომისიაში საჩივარი შეიტანა და მათი ხელახალი გადათვლა ითხოვა. საოლქო კომისიამ საჩივარი 23 ოქტომბერს განიხილა, თუმცა საიას მოთხოვნა არ დააკმაყოფილა.

"50 ბათილი ბიულეტენი, ეს უკვე დიდი რაოდენობაა, ამიტომ მათი ხელახალი გადათვლა და იმის გარკვევა გვინდოდა, რატომ იყო გაბათილებული, თუმცა არ დაკმაყოფილდა. ამიტომ სასამართლოში ვიჩივლებთ", – ამბობს იურისტი ქეთი ბებიაშვილი.

N4 დამალის საარჩევნო უბანს ეხებოდა "ახალგაზრდა იურისტთა ასოციაციის" მეორე საჩივარიც. ორგანიზაციის განმარტებით, შემაჯამებელ ოქმს, ერთ–ერთი კომისიის წევრის ხელმოწერა აკლდა. საიამ დისციპლინარული პასუხისმგებლობის დაყენება ხელფასის დაქვითვით მოითხოვა, რაც საოლქო კომისიამ სრულად დააკმაყოფილა.

N39 ასპინძის საოლქო საარჩევნო კომისიამ, ნაწილობრივ დააკმაყოფილა საიას კიდევ ერთი საჩივარი, რომელიც N9 ნაქალაქევის უბანს ეხებოდა. აქ საკონტროლო ფურცლის შევსებისას, პირველი ამომრჩევლის რეგისტრაციის მისამართი იყო გამორჩენილი, რაზეც საიამ საარჩევნო ყუთის გახსნა და ფურცლის შევსება ითხოვა, თუმცა საოლქო კომისია, მხოლოდ საუბნო კომისიის მდივნის შენიშვნით შემოიფარგლა.

ასპინძის საოლქო საარჩევნო კომისიაში, პარტია "ევროპულმა საქართველოს" საჩივარიც დაფიქსირდა, რომელიც N1 ასპინძის უბანზე დაიწერა. პარტიის მაჟორიტარის დეპუტატობის კანდიდატი მერი გიორგაძე აცხადებდა, რომ მის დედას ხმა გადასატანი ყუთის მეშვეობით უნდა მიეცა. იგი საუბნო საარჩევნო კომისიის წევრებს წინასწარ შეუთანხმდა, რომ დედა საავადმყოფოში იმყოფებოდა და ყუთი მისთვის დღის ბოლოს მიეტანათ. გიორგაძის განმარტებით, კომისიამ მისი თხოვნა არ გაითვალისწინა და გადასატანი ყუთი 16:00 საათზე დალუქა, ისე, რომ ამომრჩეველს ხმა არ მიუცია.

"წინასწარ შეთანხმების მიუხედავად ხმა ვერ მისცა ამომრჩეველმა და პარტიამ რეაგირება მოხდინა, რაიმე კონკრეტული მოთხოვნა არ იყო ოქმში, ამიტომ სარჩელი არ დაკმაყოფილდა“,–ამბობენ „ევროპულ საქართველოში“.

[ლუბა გიორგაძე, ასპინძა]