სასამართლომ ახალციხის საოლქო კომისიის ორი ოქმი ბათილად ცნო

ახალციხის რაიონული სასამართლოს მოსამართლემ გოჩა ჯეირანაშვილმა „სამართლიანი არჩევნების“ საჩივარი დღეს, 26 ოქტომბერს განიხილა.
საჩივარი ოთხ უბანზე პროცედურულ დარღვევებს ეხებოდა. უფრო კონკრეტულად N10 ვალეს საარჩევნო უბანზე რეგისტრატორის მიერ ორი ერთი და იგივე სახეობის ბიულეტენი გაიცა, N29 უბანზე ოქმის შევსების თარიღი იყო გადასწორებული, N30 და N35 უბნების შემაჯამებელ ოქმებს კი ბეჭდები არ ჰქონდა დასმული.

სასამართლომ ერთი და იგივე სახეობის ორი ბიულეტენის გაცემა და ოქმის შევსების დროის გადასწორება კანონდარღვევად მიიჩნია და ახალციხის საოლქო კომისიას საქმის ხელახლა შესწავლა დაავალა.

„როდესაც საოლქო კომისიაში ეს საკითხები განიხილეთ, თქვენ არ მიიჩნეთ არც ორი ერთნაირი ბიულეტენის ერთად გაცემა და არც დროის გადასწორება კანონდარღვევად. ამაში ვერ დაგეთანხმეთ. ეს დარღვევაა, ამიტომ ხელახლა განიხილეთ ეს საკითხი და თქვენ გადაწყვიტეთ დააკსირებთ თუ არა საუბნო კომისიის წევრებს დისციპლინურ სახდელს“, – განაცხადა სასამართლო დარბაზში მოსამართლე გოჩა ჯეირანაშვილმა.

რაც შეეხება შემაჯამებელ ოქმებზე ბეჭდების დასმას, მისი თქმით, ეს ფაქტი ოქმების ნამდვილოაბს ეჭვ ქვეშ არ აყენებს, ამიტომ მან „სამართლიან არჩევნებს“ სარჩელი ამ ნაწილში არ დააკმაყოფილა.

[თამუნა უჩიძე, ახალციხე]