ახალციხეში საჩივრების განხილვა საოლქოდან სასამართლოში გრძელდება

20 ივნისს, ახალციხის რაიონულ სასამართლოში N37 ახალციხის საარჩევნო ოლქის უბნების შესახებ ორი სასამართლო პროცესი გაიმართა. ორივე პროცესზე სასამართლომ ახალგაზრდა იურისტთა ასოციაციის წარმომადგენლის მაია გრძელიშვილის სარჩელი განიხილა.

გრძელიშვილმა სასამართლოში 6 უბნის შედეგები გაასაჩვირა: N2, N20, N28, N29, N30 და N32; ექვსივე უბანზე პრობლემას შემაჯამებელ ოქმებში არსებული ხარვეზები წარმოადგენდა.

რას ასაჩივრებს საია N2 და N20 უბნებზე

პირველი სასამართლო პროცესი N2 და N20 უბნებთან დაკავშირებული საკითხების განხილვას დაეთმო. საიას წარმომადგენელი აქ N37 ახალციხის საარჩევნო კომისიის თავმჯდომარის N123-ე განკარგულების ბათილად ცნობას ითხოვდა.

„ამ განკარგულებით მან უარი მითხრა ოლქში ჩემს მიერ წარდგენილი საჩივრზე, რომელიც N2 და N20 უბნებზე კომისიის თავმჯდომარეებისა და მდივნების მიმართ ადმინისტრაციულ სამართალდარღვევათა ოქმების შედგენას ითვალისწინებდა“, - ამბობს გრძელიშვილი.

მისი თქმით, ორივე უბნის შემაჯამებელ ოქმში მონაცემები გადასწორებული იყო, ასეთი დარღვევა 500 ლარით ჯარიმდება, საოლქო კომისიამ კი ამ უბნების თავმჯდომარეებსა და მდივნებს მხოლოდ დისციპლინური პასუხისმგებლობა დააკისრა, მათ გაფრთხილება მისცა.

„მოვითხოვ, სასამართლომ დაავალდებულოს კომისიის თავმჯდომარეს, რომ N2 და N20 უბნებზე თავმჯდომარისა და მდივნების მიმართ ადმინისტრაციულ სამართლებრივი აქტი შეადგინოს, ასევე, გაბათილდეს თავმჯდომარის N123-ე განკარგულება“, - აცხადებს გრძელიშვილი.

საია ოთხი უბნის შედეგების ბათილად ცნობას ითხოვს

რაც შეეხება N28, N29, N30 და N32 უბნებს, აქ საიას წარმომადგენელი შემაჯამებელი ოქმების ბათილად ცნობას და ამ უბნებზე კენჭისყრის შედეგების ხელახლა გადათვლას ითხოვს.

„N28, N30 და N32 შემაჯამებელ ოქმებში არ ემთხვევა კენჭისყრის დღეს მისული ამომრჩევლების რაოდენობა ერთიან სიას. მაგალითად, პროპორციულში იყო სხვა, მაჟორიტარულში სხვა, მერისა და გამგებლის შემაჯამებელ ოქმებში სხვა. სამივე უბანზე სამივე ოქმში დარღვევები იყო“, - გვიხსნის გრძელიშვილი.

N29 უბანზე კი, მისი თქმით, კენჭისყრის დღეს მისული ამომრჩევლების რაოდენობა ნაკლები იყო გამოყენებული ბიულეტენების რაოდენობასთან შედარებით: „ანუ, ამ უბანზე ერთით მეტი ბიულეტენი იყო. საოლქო კომისიაში ხსნიან, რომ რეგისტრატორმა ერთმანეთს გადააყოლა ბიულეტენები, მაგრამ ეს შემაჯამებელ ოქმში უნდა გაეთვალისწინებინა კომისიას“.

გრძელიშვილი ამავე უბნებთან დაკავშირებით ხმების ხელახლა გადათვლასთან ერთად N37 ახალციხის საარჩევნო კომისიის თავმჯდომარის N27-ე, N 28-ე, N 29-ე განკარგულებების ბათილად ცნობას ითხოვს.

რას პასუხობენ საოლქო კომისიისა და საუბნო კომისიის წევრები საიას

ექვსივე უბნის კომისიის წევრები აცხადებენ, რომ დარღვევას ადგილი ნამდვილად ჰქონდა, რომ შეცდომა მოუვიდათ, თუმცა, ეს იყო მექანიკური და არა განზრახ ჩადენილი შეცდომა. უბნების ხელახლა გადათვლა კი არაფერს შეცვლის რადგან ყველა უბანზე ხმები დაბალანსებულია. კომისიის წევრები გადაცდომას აღიარებენ და შეცდომის გამო ბოდიშს იხდიან.

მათ ეთანხმებიან N37 ახალციხის საოლქო საარჩევნო კომისიის თავმჯდომარე და იურისტები. მათი განცხადებით, საიას საჩივარი უსაფუძვლოა და არ უნდა დაკმაყოფილდეს.

„ამ უბნებზე არ ყოფილა არცერთი საჩივარი და შენიშვნა, არჩევნები ძალიან მშვიდად და სამართლიანად ჩაატარეს, ეს დაღლილობისგან მოუვდათ“, - განაცხადა N37 ახალციხის საარჩევნო კომისიის წარმომადგენლემა კარაპეტ კირაკოსიანმა.

სასამართლოში წარმოდგენილმა მესამე პირებმა საიას სარჩელთან დაკავშირებით სხვადასხვა პოზიცია დააფიქსირეს. „ქართული ოცნების“ წარმომადგენლები საოლქოსა და საუბნო კომისიის წევრებს დაეთანხმნენ. „ნაციონალური მოძრაობის“, „ბურჯანაძე - დემოკრატებისა“ და „დავით თარხან მოურავი - საქართველოს პატრიოტთა ალიანსის“ წარმომადგენლებმა კი მხარი გრძელიშვილს დაუჭირეს.

„რა უდგას წინ ამ უბნების ხელახლა გადათვლას, დაითვალოს ეს ოთხი უბანი და გაქარწყლდეს ყველა ეჭვი რაცაა“, - განაცხადეს მათ.

„ეს საოლქო კომისიისთვის შეურაცხმყოფელია, აქამდე არავის ამ უბნებთან დაკავშირებთ პრეტენზია არ გამოუთქვამს და ახლა, რადგან საიამ გაასაჩივრა, ისინიც აღარ გვენდობიან?!“, - განაცხადა სასამართლო დარბაზში N37 ახალციხის საარჩევნო კომისიის თავმჯდომარემ თეა გავაშელმა.

არცერთ სასამართლო პროცესზე მოსამართლეს გადაწყვეტილება არ გამოუცხდებია. რას გადაწყვეტს სასამართლო ცნობილი 21 ივნისს გახდება.

[თამუნა უჩიძე, ახალციხე]