რას ედავება საია ასპინძის საოლქო კომისიის თავმჯდომარეს

N39 ასპინძის საარჩევნო ოლქის N15 საარჩევნო უბანთან დაკავშირებით დავა საოლქო საარჩევნო კომისიიდან სასამართლოში გაგრძელდა. ახალგაზრდა იურისტთა ასოციაციის წარმომადგენელმა მაია გრძელიშვილმა N39 ასპინძის საარჩევნო ოლქის თავმჯდამარეს როსტომ მაგრაქველიძეს უჩივლა. საიამ N15 საარჩევნო უბანთან დაკავშირებით საოლქო კომისიის განკარგულება გაასაჩივრა.

აღნიშნულ უბანზე პროპორციული სიის შემაჯამებელ ოქმში დაშვებული შეცდომის გამო მაგრაქველიძემ, საოლქო კომისიის გადაწყვეტილებით, თავმჯდომარესა და მდივანს გაფრთხილება მისცა. საიას წარმომადგენლის განცხადებით, აღნიშნულზე თავმჯდომარეს ერთპიროვნულად უნდა ემსჯელა და კანონით N15 საარჩევნო უბნის თავმჯდომარისა და მდივნის მიმართ ადმინისტრაციულ სამართალდარღვევათა ოქმი უნდა შეედგინა. მისი მოთხოვნაც სასამართლოში სწორედ ეს გახლდათ: დაავალდებულოს სასამართლომ თავმჯდომარე, რომ მან N15 საარჩევნო უბნის თავმჯდომარისა და მდივნის მიმართ ადმინისტრაციულ სამართალდარღვევათა ოქმი შეადგინოს.

საოლქო და საუბნო კომისიის თავმჯდომარეები და წარმომადგენლები შეცდომას აღიარებენ, თუმცა აცხადებენ, რომ ეს მექანიკურად მოუვიდათ. ამით არცერთ საარჩევნო სუბიექტს რაიმე ზიანი არ მიადგა, მომხდარი საარჩევნო შედეგებზე არ აისახა და ამიტომ აღნიშნული არც რომელიმე პოლიტიკურმა პარტიამ არ გაასაჩივრა.

რაც შეეხება იმას, როსტომ მაგრაქველიძეს გაფრთხილების შესახებ გადაწყვეტილება ერთპიროვნულად უნდა მიეღო თუ კომისიასთან ერთად, იგი აცხადებს: „საჩივარი ოლქში იყო შემოსული და ამიტომ კომიასას უნდა ემსჯელა“.

მისი თქმით, თუ ახლა სასამართლო მიიღებს გადაწყვეტილებას და საუბნო კომისიის წევრებს 500 ლარით დააჯარიმებს, სამომავლოდ, დიდი საფრთხე არსებობს, რომ საუბნო კომისიის წევრები ვეღარ შეირჩნენ: „შემდეგ არჩევნებზე ამ ადამიანებს სურვილი აღარ ექნებათ რომ თავიანთ სოფელს გვერდში დადუგნენ, ისეც 34 დღეში ხელზე 187 ლარს იღებენ“.

„ის საყვედური და გაფრთხილება რაც თავმჯდომარემ მოგვცა, ჩვენთვის დიდი სასჯელია“, - განაცხადეს სასამართლო დარბაზში N15 საარჩევნო უბნის მდივანმა და თავმჯდომარემ.

ახალციხის რაიონული სასამართლოს მოსამართლემ გია ბერაიამ სიას სარჩელი არ დააკმაყოფილა.

„მომხდარით ზიანი არავის მიდგომია, ეს არის ადმინისტრაციული გადაცდომა“, - განაცხადა მან.

გაასაჩივრებს თუ არა საია ახალციხის რაიონული სასამართოს გადაწყვეტილებას ჯერ უცნობია.

[თამუნა უჩიძე, ახალციხე]