საიას სარჩელი ასპინძის საოლქოს წინააღმდეგ არ დაკმაყოფილდა

„ახალგაზრდა იურისტთა ასოციაციამ“ N4 დამალის საარჩევნო უბანზე მაჟორიტარული არჩევნების შემაჯამებელ ოქმში 50 ბათილი ბიულეტენი საეჭვოდ მიიჩნია. ამიტომ საია ამ ბიულეტენების ხელახლა გადასინჯვას მოითხოვდა. აღნიშნული საკითხი ასპინძის საოლქო საარჩევნო კომისიამ განხილვისას იმ მიზეზით არ დააკმაყოფილა, რომ კანონით არაა განსაზღვრული თუ რამდენი ბათილი ბიულეტენი არ შეიძლება იყოს უბანზე.

N39 ასპინძის საოლქო საარჩევნო კომისიის თავმჯდომარის ნიკოლოზ ლოლაძის თქმით, აქ ბევრი ბიულეტენი საერთოდ არ იყო შემოხაზული, ნაწილში კი ორი კანდიდატი ამომრჩეველს ერთად ჰქონდა მოხაზული.

დღის განმავლობაში რომ საარჩევნო უბანზე რაიმე დარღვევას ადგილი არ ჰქონია, ამაზე სასამართლო დარბაზში ამავე უბნის თავმჯდომარემ მჰერ ნაჰაპეტიანმაც ისაუბრა. მისი თქმით, სოფელში ბევრი ასაკოვანიც ცხოვრობს და შესაძლოა გაუჭირდათ გარჩევა ვინ უნდა შემოეხაზათ.
ამომრჩევლის ნების გამოხატვის დაცვის მიზნით კი ბათილი ბიულეტენების რაოდენობის სიმრავლიდან გამომდინარე, საია მათ ხელახლა გადასინჯვას ითხოვდა, მიუხედავად იმისა, რომ ვერცერთი ბულეტენი ამ უბანზე შედეგებს ვერ შეცვლიდა.

მოსამართლე გია ბერაიამ საიას სარჩელი არ დააკმაყოფილა. მისი თქმით მომჩივანმა დარღვევაზე ვერ მიუთითა, მხოლოდ ეჭვი კი ბიულეტენების გადასინჯვის საფუძველი ვერ გახდებოდა.

გაასაჩივრებს თუ არა საია სასამართლოს გადაწყვეტილებას ზემდგომ ინსტანციაში, ჯერ უცნობია.

[თამუნა უჩიძე, ახალციხე]