მესხეთში საერთაშორისო საფეხბურთო ფესტივალი დაიწყო

ფესტივალის საზეიმო გახსნას მესხეთის საფეხბურთო ფესტივალის დირექტორი ირაკლი ქურდაძე, საქართველოს სპორტისა და ახალგაზრდობის საქმეთა მინისტრი ლევან ყიფიანი, ბავშვთა და ახალგაზრდობის განვითარების ფონდის დირექტორის მოადგილე მურმან პატარაია და ახალციხის მუნიციპალიტეტის საკრებულოს თავმჯდომარე ოლეგ სადროშვილი ესწრებოდნენ.

მას შემდეგ, რაც ფესტივალის დირექტორმა სტუმრებს გუნდები წარუდგინა, ფესტივალზე კულტურული ღონისძიებები დაიწყო. ფესტივალი ადგილობრივმა ქორეოგრაფიულმა ანსამბლმა „მესხეთმა“ ცეკვა ყაზბეგურით გახსნა.

„ძალიან მნიშვნელოვან ტურნირს ჩაეყარა საფუძველი, რომელიც ამ რეგიონისთვის ძალიან მნიშვნელოვანია. მესხეთის ამ ტურნირს დიდი სიკეთე ელის იმ მხრივ, რომ ძალიან დიდი ინტერესია სპორტსმენების მხრიდან“, – განაცხადა საქართველოს სპორტისა და ახალგაზრდობის საქმეთა მინისტრმა ლევან ყიფიანმა.

მესხეთის საფეხბურთო ფესტივალი მეორე წელია საქართველოს სპორტისა და ახალგაზრდობის საქმეთა სამინისტროსა და ბავშვთა და ახალგაზრდობის განვითარების ფონდის მხარდაჭერით იმართება.

„ეს უნდა იქცეს ტრადიციად. ჩვენ ყოველთვის დავუჭერთ მხარს, გამომდინარე იქიდან, რომ დღეს მასობრივი ფეხბურთის განვითარებას სასიცოცხლო მნიშვნელობა აქვს“,– ამბობს ბავშვთა და ახალგაზრდობის განვითარების ფონდის დირექტორის მოადგილე მურმან პატარაია.

გახსნითი თამაშების დასრულების შემდეგ გულშემატკივრებისთვის გათამაშება გაიმართა. წამახალისებელი გათამაშების მთავარი პრიზი, ორკაციანი საგზური თურქეთის ქალაქ ალანიაში, ახალციხელმა, მეხუთე სკოლის მოსწავლე მარიამ თათენაშვილმა მოიგო.

მესხეთის საფეხბურთო ფესტივალის გახსნის დღე ახალციხის ციხეზე კონცერტით დასრულდება.

5–6 ივნისს გუნდებს შორის კალენდარული თამაშები გაიმართება. 7 ივნისს კი მესხეთის საფეხბურთო ფესტივალი გამარჯვებული გუნდების დაჯილდოვებით დასრულდება.

გამარჯვებული გუნდები თასებით, მედლებით, სიგელებით და ფასიანი საჩუქრებით დაჯილდოვდებიან.



[მანანა სარაშვილი, ახალციხე]