მესხეთის თეატრში ეროვნული დრამატურგიის ფესტივალი გაიხსნა

ეროვნული დრამატურგიის მესამე ფესტივალი მიხეილ თუმანიშვილის სახელობის კინომსახიობთა თეატრმა გახსნა, სპექტაკლით: „ბალადა ვეფხისა და მოყმისა“.

ფესტივალის გახსნა კულტურის მინისტრი მიხეილ გიორგაძე, ასევე რეჟისორები, თეატრთმცოდნეები, მსახიობები და ადგილობრივი ხელისუფლების წარმომადგენლები დაესწრნენ.

„მესხეთში დღეს დიდი ზეიმი დაიწყო. ძალიან მნიშვნელოვანია ეს ფესტივალი მესხეთის თეატრისთვის“, – ასე შეაფასა ფესტივალის გახსნა საქართველოს კულტურის მინისტრმა მიხეილ გიორგაძემ.

სპეციალურად ფესტივალისთვის ახალციხის მერიამ კონკურსი დააწესა. ნომინაციაში – „საუკეთესო დრამატული ნაწარმოები“ გამარჯვებული ეროვნული დრამატურგიის ფესტივალს დახურავს.

შეგახსენებთ, წელს, ეროვნული დრამატურგიის მესამე თეატრალურ ფესტივალში საქართველოს სხვადასხვა ქალაქის 14 თეატრი მონაწილეობს. სამი კვირის განმავლობაში მაყურებლისთვის სპექტაკლებს გამართავენ: თბილისის, გორის, რესთავის, ჭიათურის, ქუთაისის, ფოთის, სოხუმის და მესხეთის თეატრის დასები.

ეროვნული დრამატურგიის თეატრალური ფესტივალი ქალაქ ახალციხის მერიისა და კულტურისა და ძეგლთა დაცვის სამინისტროს ფინანსური მხარდაჭერით იმართება.

[ვარლამ წიკლაური, ახალციხე]