ახალციხე მესხეთის საერთაშორისო საფეხბურთო ფესტივალს უმასპინძლებს [Video]

ფესტივალი ახალციხის სტადიონზე 4 ივნისს 14:00 საათზე გაიხსნება. ამ დღეს სტადიონზე სხვადასხვა კულტურული ღონისძიებებია დაგეგმილი, საღამოს კი ახალციხის ციხეში დასკვნითი კონცერტი გაიმართება.

მესხეთის საერთაშორისო საფეხბურთო ფესტივალის დირექტორის, ირაკლი ქურდაძის განმარტებით, ფესტივალი 7 ივნისს, საზეიმოდ დაიხურება. გამოვლინდება გამარჯვებული გუნდი და მონაწილეებს გადაეცემათ სხვადასხვა პრიზები და საჩუქრები.

გარდა ამისა, მაყურებლებისთვის დაგეგმილია წამახალისებელი გათამაშება, სადაც მთავარი პრიზი იქნება ერთკვირიანი, ორკაციანი საგზური ალანიაში,4–ვარსკვლავიან სასტუმროში. გათამაშდება სხვა პრიზებიც.

მესხეთის საერთაშორისო საფეხბურთო ფესტივალის გახსნასთან დაკავშირებით, დღეს, 28 მაისს, სპორტისა და ახალგაზრდობის საქმეთა სამინისტროს საკონფერენციო დარბაზში პრესკონფერენცია გაიმართა. პრესკონფერენციას ესწრებოდნენ სპორტისა და ახალგაზრდობის საქმეთა მინისტრი ლევან ყიფიანი და ბავშვთა და ახალგაზრდობის განვითარების ფონდის დირექტორი - ირაკლი ჟორჟოლიანი.

პროექტის დონორები არიან: საქართველოს სპორტის და ახალგაზრდობის საქმეთა სამინისტრო, ბავშვთა და ახალგაზრდობის განვითარების ფონდი და ახალციხის მუნიციპალიტეტი. პროექტის გენერალური სპონსორია: პე-ეს-პე.

მსგავსი ფესტივალი მესხეთში პირველად გასულ წელს ჩატარდა. შარშან ფესტივალის გამარჯვებული ლაგოდეხის გუნდი გახდა.



[ნინო ნარიმანიშვილი, ახალციხე]