მესხეთის საფეხბურთო ფესტივალის გამარჯვებული ლაგოდეხი გახდა

ფინალურ მატჩში, რომელიც ახალციხის ცენტრალურ საფეხბურთო მოედანზე გაიმართა, გამარჯვებისთვის ლაგოდეხის ‘რანი’ და ოზუგერთის ‘მერცხალი’ იბრძოდნენ.

თამაში დაძაბულად მიმდინარეობდა. მონაწილე გუნდებმა ვერც ძირითად და ვერც დამატებით დროში ანგარიშის გახსნა ვერ მოახერეს. საბოლოოდ, ლაგოდეხის ‘რანმა’, ანგარიშით 6:5, ოზურგეთის ‘მერცხალი’ პენალტების სერიით დაამარცხა.

‘ძალიან გვინდოდა მოგება, იმედიც გვქონდა და გაგვიმართლა, ამხელა გზაზე ტყულად რომ არ ჩამოვედით’, -ამბობს ‘რანის’ გუნდის კაპიტანი ვაღა ბერეჩიძე.

მომავალში უკეთ მომზადებას აპირებენ მეორე ადგილზე გასული, ოზურგეთის გუნდის მონაწილეები.

მესხეთის საფეხბურთის საერთაშორისო ფესტივალს საქართველოს სპორტისა და ახალგაზრდობის საქმეთა მინისტრი ლევან ყიფიანიც ესწრებოდა.

‘ძალიან მნიშვნელოივანია ის, რომ ახალციხემ გაუწია მასპინძლობა ამ ფესტივლს. ეს გაგრძელდება და იმედი მაქვს, რომ მომვალ წლებში უფრო მობილიზებულები იქნებიან მაყურებლები. მსგავსი სახის ტურნირებს ჩვენ მხარდაჭერას მომავალშიც აუცილებლად გავუწევთ’, -ამბობს ლევან ყიფიანი.

ფინალში გასულ გუნდებს სიგელები, მედლები და თასი გადაეცათ. გამოვლინდნენ სხვადასხვა საპრიზო ადგილების მფლობელებიც.

‘გამოვავლინეთ რამდენიმე ნომინაციაში გამარჯვებულები და მათ საღამოს, ახალციხის ციხეში გამართულ დასკვნით ღონისძიებაზე დავაჯილდოვებთ. არის ნომინაცია საუკეთესო მოთამაშე, მაყურებლის სიმპატია და ა.შ. ფესტივალმა შეასრულა ის მიზანი, რასაც ემსახურებოდა, ბევრი ახალგაზრდა ჩართო ჯანსაღი ცხოვრების წესში’, - ამბობს ფესტივალის დირექტორი ირაკლი ქურდაძე.

ახალციხის ცენტრალურ სტადიონზე, ფინალური შეხვედრის დაწყებამდე, კიდევ ერთი თამაში გაიმართა.

მესამე ადგილისთვის ერთმანეთს ადიგენისა და ახალციხის გუნდები შეხვდნენ. გამარჯვება, ანგარიშით 2:1, ადიგენის გუნდმა მოიპოვა.

შეგახსენებთ, მესხეთის საერთაშორისო საფეხბურთო ფესტივალი წელს პირველად გაიმართა. ფესტივალი 27 ივნისს დაიწყო და სამი დღის განმავლობაში, მის ფარგლებში, არაერთი ღონისძიება გაიმართა.

[ნუკა სტეფნაძე, ახალციხე]