ახალციხე საფეხბურთო ფესტივალს უმასპინძლებს

ფესტივალი 27 ივნისს დაიწყება და სამი დღის განმავლობში გაგრძელდება. ფესტივალის პირველ დღეს დაგეგმილია: გუნდების წარდგენა, სტუმრებისა და სპონსორების მისალმება, გოგონების მატჩი, მუსიკალური და საცეკვაო ნომრები, საპრიზო გათამაშება მაყურებლებისთვის და სპეციალური ამხანაგური მატჩი.

ფესტივალის ფარგლებში ყველა მონაწილეს საშუალება ექნება დაესწროს მესხეთის თეატრში სპეციალურ წარმოდგენას, რომელიც ბავშვებისთვის დაიდგა. ასევე მესხეთის თეატრში დიდ ეკრანზე ფესტივალის შესახებ მომზადებულ ფილმს აჩვენებენ.

გახსნის ცერემონიის შემდეგ მოწვეული სტუმრებისა და ყველა მონაწილე გუნდისთვის მოეწყობა რაბათის ტური. საღამო გაგრძელდება კონცერტით, სადაც მონაწილეობას მიიღებენ ადგილობრივი მუსიკალური და ცეკვის ანსამბლები.

გუნდის მწვრთნელებისა და მენეჯერებისთვის მოეწყობა სპეციალური შეხვედრა, სადაც ისინი გაცვლიან გამოცდილებას და გააღრმავებენ კონტაქტებს.

ფინალური მატჩის შემდეგ გაიმართება გამარჯვებული გუნდებისა და ნომინაციებში გამარჯვებული სპორტსმენების საზეიმო დაჯილდოების ცერემონია. ფესტივალი ფეიერვერკით დაიხურება.

ახალგაზრდულ საფეხბურთო ფესტივალს საფუძველი ჩაეყარა ახალციხის მუნიციპალიტეტის სოფელ მუსხში, სადაც 2007 წლიდან 2011 წლამდე იმართებოდა საფეხბურთო ტურნირი რეგიონის ახალგაზრდების მონაწილეობით.

მესხეთის ფესტივალი წელს პირველად ტარდება. ორგანიზატორები ამბობენ, რომ სპორტული ღონისძიება ტრადიციად იქცევა. მათი მიზანია მოიზიდონ არამარტო რეგიონების ახალგაზრდები, არამედ საერთაშორისო დონეზე, ყველა დაინტერესებული ახალგაზრდული საფეხბურთო სკოლა.

ფესტივალი ყოველწლიურად ახალციხეში, ზაფხულში, მესხეთის ცენტრალურ სტადიონზე გაიმართება.

[მანანა სარაშვილი, ახალციხე]