ახალციხეში საფეხბურთო ფესტივალი გაიხსნა

სტადიონზე სხვადასხვა ღონისძიებები ამ წუთებშიც მიმდინარეობს.

საერთაშორისო საფეხბურთო ფესტივალში 12 საფეხბურთო გუნდი მონაწილეობს. აქედან, რვა გუნდი საქართველოს სხვადასხვა რეგიონებიდანაა, ორ-ორი კი სომხეთიდან და აზერბაიჯანიდან.

საფეხბურთო ფესტივალს არასამთავრობო ორგანიზაცია „ჯანსაღი ცხოვრება“ მართავს, რომელიც მრავალი წელია სხვადასხვა ახალგაზრდულ, კულტურულ და სპორტულ პროექტებს ახორციელებს.

ამ 12 გუნდიდან, დღეს მხოლოდ ნაწილი ითამაშებს. ცენტრალურ სტადიონზე მატჩები კიდევ ორი დღის განმავლობაში გაიმართება.
ფესტივალის პარალელურად, მიმდინარეობს თეატრალური სანახაობები, თბილისიდან მოწვეული გოგონათა ანსამბლი ასრულებს ცეკვებს, ღონისძიებაში ადგილობრივი სასიმღერო ანსამბლებიც მონაწილეობენ.

თამაშდება სხვადასხვა პრიზებიც. მაყურებლებს აქვთ ავტომობილის მოგების შანსიც.

„აღნიშნული ნომრები ფესტივალს უფრო ეფექტურს გახდის. სტადიონზე სპეციალური ყუთი დგას, სადაც მაყურებელს შესაძლებლობა აქვს მოათავსოს ბილეთი და მოიგოს სხვადასხვა პრიზი“, - ამბობს ფესტივალის დირექტორი ირაკლი ქურდაძე.

მისივე თქმით, ფესტივალის მთავარ მიზანია ჯანსაღი ცხოვრების წესის პოპულარიზება, მეზობელი სახელმწიფოების დამეგობრება და კონტაქტების გაცვლა.



[მანანა სარაშვილი, ახალციხე]