ასპინძაში ზარალის ოდენობას ითვლიან

ძლიერმა სეტყვამ განსაკუთრებული ზიანი ასპინძის მუნიციპალიტეტის სოფელ იდუმალას მიაყენა. გარდა სახნავ-სათესი ფართობებისა, სეტყვის გამო დაზიანდა სახლის სახურავები და დაიხოცა შინაური ფრინველი.

- ”კაკალზე დიდი სეტყვა იყო, მოსავალი გაფუჭდა, ”შუშები” ჩაგვილეწა, სახურავი დახვრიტა, ხელიდან წავიდა ყველაფერი, კიტრი, პომიდორი, კარტოფილი, ყველაფერი განადგურდა”, - გვებნება იდუმალაში მცხოვრები ლიზი ამირიძე.

ამავე სოფლის მცხოვრების ელიკო გოგიშვილის თქმით, განსაკუთრებით სავალალო მდგომარეობაში ჩავარდა ვენახი: ”სიმინდი, ლობიო, თუ რამე გვაქვს ყველაფერი დაზიანდა. ”შიფერი” ჩამოამტვრია, ყურძენი საერთოდ აღარ ვარგა. ქათმები და წიწილები დაგვეხოცა”.

გარდა იდუმალისა სეტყვამ ნაწილობრივ დააზარალა დაბა ასპინძა და სოფლები: დამალა, ოთა, ოშორა და რუსთავი.

ადგილობრივ მუნიციპალიტეტში შექმნილი კომისია ამ წუთებში მდგომარეობას სწავლობს.

- ”შექმნილია ზარალის დამთვლელი კომისა და ყველაფერი კეთდება იმისათვის, რომ გადაუდებელი რაც არის მოგვარდეს. უახლოეს მომავალში დავიწყებთ ყველაფრის აღდგენას”, - ამბობს ასპინძის მუნიციპალიტეტის გამგებელი ბესო ბექაური.

რითი დაეხმარებიან დაზარალებულებს მას შემდეგ გაირკვევა, რაც კომისია ზარალის ოდენობას დაადგენს.

- ”მაქსიმალურად შევცდებით სტიქიისგან მიყენებული ზიანი სრულად ავანაზღაუროთ. თითოეულ ოჯახზე შედგება აქტი და გვეცოდინება ვის რა ესაჭიროება”, - ამბობს გამგებელი.





[თინათინ ზაზაძე, ასპინძა]