ადიგენში სტიქიით მიყენებული ზარალის ოდენობას ჯერ ისევ ითვლიან

14 სექტემბერს, ადიგენის მუნიციპალიტეტში უხვი ნალექის გამო დაზარალებულ 9 სოფელში ზარალის დამთვლელი კომისია მეორე დღეა მუშაობს.

ადიგენის მუნიციპალიტეტის გამგებლის მოადგილის არსენ ბალახაშვილის განცხადებით, პატარა სმადა უკვე მოიარეს, ამჟამად ჯგუფი დიდ სმადასა და ლელოვანში მუშაობს: „ამის გარდა, კიდევ 7 სოფელია შემოსავლელი. ჯერ ვერ გეტყვით კომისია მუშაობას როდის დაასრულებს. ყველა ოჯახში სათითაოდ შევდივართ და ვზომავთ დაზიანებულ მიწის ნაკვეთებს“.

ბალახაშვილის თქმით, ის რაც უკვე მან ნახა, ბოსტნეული და ხეხილი 100 პროცენტითაა დაზიანებული. ასევე დაზიანებულია საცხოვრებელი სახლები: „სახურავი გადახადა ქარმა სახლებს, დაიმსხვრა მინებიც“.

მიყენებული ზიანის გამო კომისია ორი მიმართულებით მუშაობს, ერთი ნაწილი დაზიანებულ ინფრასტრუქტურას, მეორე კი სასოფლო-სამეურნეო სავარგულებს სწავლობს.

„გზა არსადაა ჩახერგილი. ასეთი პრობლემა ცენტრალურ გზაზე შეგვექმნა მხოლოდ და ისიც მალევე გავწმინდეთ“, - აცხადებს ბალახაშვილი.

შეგახსენებთ, ადიგენის სოფლებს სტიქიამ 14 სექტემბერს შეუტია. სეტყვამ მუნიციპალიტეტის 9 სოფელი დააზარალა. განადგურდა ხეხილი და სასოფლო–სამეურნეო სავარგულები.

[Sknews.ge]