ნინოწმინდაში სტიქიისგან მიყენებულ ზარალს ითვლიან

რა ფართობზე დააზიანა სეტყვამ ნაკვეთები, ნინოწმინდის მერიაში ვერ აკონკრეტებენ. მერის მოადგილის ალექსანდრე მიქელაძის თქმით, ზარალის დამთვლელი კომისია დასკვნას ზარალის შესწავლის შემდეგ დადებს.

„ხვალ, ალბათ, ზარალის ოდენობის შესახებ გვეცოდინება ყველაფერი, დღესვე უნდა დაასრულონ შესწავლა. ვფიქრობ, რომ ზიანი დიდი არ უნდა იყოს, რადგან კარტოფილის ნათესები ჯერ არ ამოსულა და სეტყვა ვერაფერს უზამდა“, – განმარტავს მერის მოადგილე.

ძლიერი სეტყვა ქალაქ ნინოწმინდაში და სოფელ ოროჯალაში რვა ივნისს, საღამოს 17:00 საათისათვის იყო. როგორც „სამხრეთის კარიბჭეს“ ნინოწმინდის მერმა ანივარდ მოსოიანმა განუცხადა, დაზიანებულია მარცვლეულისა და კარტოფილის ნაკვეთები, ასევე – ბოსტნეული.

[ლუბა გიორგაძე, ნინოწმინდა]