სამცხე-ჯავახეთში ზარალის ოდენობა ჯერ დადგენილი არ არის

სამცხე-ჯავახეთში პრეზიდენტის რწმუნებულის-გუბერნატორის ადმინისტრაციის პრესსამსახურის უფროსის ია გოგატიშვილის განცხადებით, სამხრეო ადმინისტრაციაში მოქალაქეთა განცხადებები ჯერ ისევ შედის. ამიტომ, ამ ეტაპზე ზარალის ოდენობაზე საუბარი რთულია.

19 ივლისს მოსულმა სტიქიამ განსაკუთრებით სამცხე-ჯავახეთის სამი მუნიციპალიტეტი ახალციხე,ასპინძა და ახალქალაქი დააზარალა. განადგურდა სასოფლო-სამეურნეო სავარგულები, დაიმტვრა სახლების სახურავები, დაზიანდა მანქანები, ჩაიმსხვრა ფანჯრების მინები და დაიხოცა შინაური ფრინველი.

სეტყვის შედეგად ახალციხის მუნიციპალიტეტში 18 სოფელი დაზარალდა. სტიქიისგან განსაკუთრებით დაზარალდა ქალაქი ვალეც, სადაც სეტყვა ახალციხემდე რამდენიმე წუთით ადრე დაიწყო. დაზიანებული სახურავებიდან წყალი მოსახლეობას საცხოვრებელ სახლებში ჩავიდა. მთლიანად განადგურდა ნათესები ათასობით მეასედ ფართობებზე.

შედარებით ნაკლები ზარალი მიიღო სტიქიისგან ასპინძის მუნიციპალიტეტმა. როგორც ადგილობრივ ხელმძღვანელობაში განგვიმარტეს, სეტყვამ ასპინძის ხუთი სოფელი დააზარალა: დამალა, ოთა, ოშორა, რუსთავი და იდუმალა. ამათგან, განსაკუთრებით მძიმე იყო სოფელ იდუმალის მდგომარეობა.

ასევე შედარებით ნაკლები სიძლიერის იყო სტიქია ახალქალაქში. მუნიციპალიტეტის სოფლებს სტიქიამ სხვადასხვა დროს და განსხვავებული სიძლიერით შეუტია. განსაკუთრებული ზარალი მიიღო სოფლებმა: გოგაშენი, აფნია, კიროვაკანი, ბარალეთი და კუმურდო.

ამჯერად სტიქიას გადაურჩა ადიგენის, ბორჯომისა და ნინოწმინდის მუნიციპალიტეტები.

სტიქიის ნარჩენებისგან ქალაქი უკვე გაწმენდილია. სრულად აღდგენილია ელექტოროენერგიის მიწოდებაც. მოსახლეობის ნაწილმა ბოსტნები განადგურებული ნათესებისგანაც გაასუფთავა.

[ნინო ნარიმანიშვილი, ახალციხე]