სპორტული ცეკვების ფესტივალი ახალციხეში

სპორტული ცეკვების ფესტივალი საქართველოს სპორტისა და ახალგაზრდობის საქმეთა სამინისტროს ორგანიზებითა და საქართველოს სპორტული ცეკვების ეროვნული ფედერაციის ძალისხმევით ჩატარდა. მასში მონაწილოება სხვადასხვა ასაკობრივ კატეგორიაში, ბათუმის, თბილისისა და ახალციხის შვიდმა წამყვანმა სტუდიამ მიიღო.

- „საერთაშორისო ფესტივალის ჩატარებაც გვინდა, მაგრამ ადგილის უქონლობის გამო ვერ ვატარებთ. აქ არსებული დარბაზები საერთაშორისო სტანდარტებს არ შეესაბამება, აუცილებლია სპორტული დარბაზი, რომელიც ყველა სტანდარტს დააკმაყოფილებს“, - განმარტავს სამცხე-ჯავახეთის სპორტული ცეკვების ფედერაციის თავმჯდომარე ელდარ გელაშვილი.

ფესტივალზე სხვადასხვა ასაკობრივ კატეგორიებში გამარჯვებულები გამოვლინდნენ, რომლებიც სპეციალურმა ჟიურიმ შეაფასა. გამარჯვებულებს სპორტისა და ახალგაზრდობის საქმეთა სამინისტროს მიერ დაწესებული თასები გადაეცათ. ფესტივალის ყველა მონაწილეს კი წამახალისებელი პრიზები დაურიგდათ.


- „ჩვენმა მოცეკვავეებმა ძალიან კარგი შედეგი აჩვენეს, ერთ-ერთ ასაკობრივ კატეგორიაში პირველი ადგილიც მიიღეს და კმაყოფილები დავრჩით დღევანდელი დღით, ეს ღონისძიებაც ძალიან ლამაზად ჩატარდა და მადლობას ვუხდით ფესტივალის ორგანიზატორებს“, - ამბობს აჭარის სპორტული ცეკვების ფედერაციის თავმჯდომარე ნინო ქავზინაძე.

[თამარ თოთაძე, ახალციხე]