ადიგენში ოჯახის სიმტკიცის დღე აღნიშნეს

ადიგენში, თამარ მეფის სახელობის ტაძარში დღეს დილით ღვთისმშობლის სამადლობელი პარაკლისი გადაიხადეს. პარაკლისის დასრულების შემდეგ კი ხატებით ხელში სასულიერო პირებმა და მრევლმა ქუჩაში მსვლელობა მოაწყო.

როგორც მამა რევაზი (კაპანაძე) ამბობს, დღეს მათ პატრიარქის კურთხევა შეასრულეს. 17 მაისი უწმინდესმა და უნეტარესმა ილია მეორემ ოჯახის სიმტკიცისა და მშობლების პატივისცემის დღედ გამოაცხადა და ამიტომ ლოცვითა და გალობით ადიგენის ქუჩებს აკურთხებენ.

„ამას იმიტომ ვაკეთებთ, რომ ღვთისა და ჩვენი ქვეყნის მტრებმა ვერაფრით დაგვაბრკოლონ“, - ამბობს მამა რევაზი.

მსვლელობას შეუერთდა ადიგენში მოქმედი არასამთავრობო ორგანიზაცია „საზოგადოებრივი დარბაზის“ ხელძღვანელი გოდერძი კუბლაშვილი.

„პატრიარქის კურთხევით დღეს მთელ საქართველოში ქუჩები წყლით ეკურთხა, რადგან ქვეყნის არაკეთილმოსურნეებმა დაინახონ ქრისტიანობის ძალა, ჩვენ არავის არაფერს არ ვუშლით, ჩვენ სარწმუნეობას ვიცავთ. მავანმა უნდა გაიგოს ქრისტიანობისა და ქართველი ხალხის ძალა“, - აცხადებს კუბლაშვილი.

თამარ მეფის სახელობის ეკლესიის მრევლი ციალა ხარაიშვილი ამბობს, რომ დღეს არაფერს აპროტესტებს, ასე ოჯახის სიწმინდეს იცავს და პატრიარქის კურთხევას უერთდება.

შეგახსენებთ, 17 მაისი, რა დროსაც მსოფლიოში ჰომოფობიისა და ტრანსფობიის წინააღმდეგ ბრძოლის საერთაშორისო დღე აღინიშნება - საქართველოში "ოჯახის სიმტიკიცის, მშობლების პატივისცემისა და მოხსენიების დღედ", საქართველოს პატრიარქმა, უწმინდესმა და უნტარესმა ილია მეორემ დააწესა.

[თამუნა უჩიძე, ადიგენი]