ახალციხის ეპარქია ოჯახის სიწმინდის დღესთან დაკავშირებულ მსვლელობას შეუერთდა

დღეს, 17 მაისს საპატრიარქოს მიერ დაწესებული ოჯახის სიწმინდის დღესთან დაკავშირებით თბილისში აქციები გაიმართა. მათ დილიდანვე ახალციხისა და ტაო–კლარჯეთის ეპარქიის წარმომადგენლები სრული შემადგენლობით შეუერთდნენ.

„ეპარქიის მრევლთან ერთად, თითქმის ყველა ეკლესიიდან, სამარშრუტო ტაქსებით ორგანიზებულად წავედით. ვისაც თბილისამდე ჩამოსვლის საშუალება ჰქონდა, ყველა აქ არის. ოჯახის სიმტკიცის დღეს მთელი ქვეყნის მრევლი აღნიშნავს, ამიტომ ჩვენც ჩამოვედით და ვუერთდებით საყოველთაო დღესასწაულს“, – ამბობს მღვდელი ნიკოლოზ აბრამიშვილი.

მაცხოვრის ამაღლების ტაძრის მღვდელი გიორგი ქურდაძე ამბობს, რომ იგი ოჯახთან ერთად თბილისში აქციაზე საკუთარი ინიციატივით წავიდა: „აქციის მონაწილეების ნაწილი დილით ქაშუეთში წირვას დაესწრო, ნაწილი რესპუბლიკის მოედანზე შემოგვიერთდა. აქ საქართველოს ყველა კუთხიდან არიან".

17 მაისი ჰომოფობიასა და ტრანსფობიასთან ბრძოლის საერთაშორისო დღეა. საქართველოში ეს დღე თავისი საერთაშორისო მნიშვნელობით, პირველად 2011 წელს აღინიშნა და მას შემდეგ არცერთ აქციას დაპირისპირების გარეშე არ ჩაუვლია. ყველაზე მწვავე, 2013 წელი იყო, როდესაც ჰომოფობიისა და ტრანსფობიის წინააღმდეგ თბილისში, პუშკინის სკვერში შეკრებილ ადამიანებს სასულიერო პირების მიერ ორგანიზებულმა კონტრაქციამ შეკრებასა და მანიფესტაციაში შეუშალა ხელი.

2014 წლის 11 მაისს, საქართველოს კათალიკოს პატრიარქმა ილია მეორემ საკვირაო ქადაგებაზე გამოაცხადა, რომ 17 მაისს ეკლესია "ოჯახის სიმტიკიცის, მშობლების პატივისცემისა და მოხსენიების დღეს" აღნიშნავს. ამის შემდეგ საპატრიარქო ყოველ წელს ატარებს ხატით მსვლელობებს, მოუწოდებს მრევლს, გამოვიდეს ქუჩაში და აღნიშნოს “ოჯახის სიმტკიცის დღე”.

[ავთო ინასარიძე, ახალციხე]