პატრიარქის კურთხევით, 17 მაისი ოჯახის სიმტკიცის დღეა

ეკლესიამ ჩათვალა, რომ ვინაიდან, აწყურის ყოვლადწმიდა ღვთისმშობლის ხატის დედაქალაქში პირველად შებრძანება აღინიშნება, ეს დღეები ლოცვითი მსვლელობებითა და მსახურებებით უნდა აღინიშნოს.

17 მაისი ოჯახის სიმტკიცის დღედ, საქართველოს კათოლიკოს პატრიარქმა 2014 წლის 11 მაისს, საკვირაო ქადაგებისას დააწესა. ილია მეორემ სამღვდელოებას მისცა ლოცვა-კურთხევა, 17 მაისს, 12:00 საათზე, ტაძრებში ჩაატარონ პარაკლისი, ნაკურთხი წყლით აკურთხონ ტაძრები, სახლები, ოჯახები და ქუჩები. ოჯახებში ნაკურთხი წყლის პკურების კურთხევა პატრიარქმა საერო პირებსაც მისცა.

გასულ, 2014 წელს, ოჯახის სიმტკიცის დღე ადიგენსა და ახალციხეშიც აღნიშნეს. ახალციხეში მრევლი ამაღლების სახელობის ტაძარში შეიკრიბა. მას შემდეგ, რაც ეკლესიის წინამძღვარმა სავედრებელი პარაკლისი გადაიხადა, ახალციხის ქუჩებში მსვლელობა მოეწყო. თამარ მეფის სახელობის ტაძარში გადაიხადეს ღვთისმშობლის სამადლობელი პარაკლისი ადიგენში და აქაც, პარაკლისის შემდეგ ხატებით ხელში ქუჩაში მსვლელობა მოეწყო.

მიმდინარე, 2015 წელს, საქართველოს საპატრიარქომ ოჯახის სიმტკიცის დღესთან დაკავშირებული ღონისძიებები გადადო.

"16-17 მაისს აწყურის ყოვლადწმიდა ღვთისმშობლის ხატის დედაქალაქში პირველად შემობრძანება აღნიშნება, ამიტომ საქართველოს ეკლესიამ უმჯობესად მიიჩნია, ეს დღეები ლოცვითი მსვლელობებით და მსახურებებით აღნიშნოს. ჩვენი სურვილი გაითვალისწინეს შემოქმედებითმა კოლექტივებმა, არასამთავრობო ორგანიზაციებმა და საზოგადოებრივმა ჯგუფებმა და 17 მაისისთვის, - ოჯახის სიმტკიცისა და სიწმინდის დაცვის დღისადმი მიძღვნილი მათ მიერ დაგეგმილი ღონისძიებები გააუქმეს, რისთვისაც დიდ მადლობას ვუხდით", – ნათქვამია საქართველოს საპატრიარქოს განცხადებაში.

17 მაისს სამების საკათედრო ტაძარში, სადაც დაბრძანებული იქნება აწყურის ღვთისმშობლის ხატი და სხვა სიწმინდეები, სრულიად საქართველოს კათოლიკოს-პატრიარქი აღავლენს წირვას, გადაიხდის პარაკლისს და წაკითხული იქნება გვარებისა და ოჯახების კურთხევის ლოცვა.

[ნინო ნარიმანიშვილი, ახალციხე]