ადიგენში სტიქიით მიყენებული ზარალის ოდენობას ითვლიან

ადიგენის მუნიციპალიტეტის სოფელ ბოლაჯურში მცხოვრებ თენგიზ მიშველაძეს წყლის ნიაღვარმა კედელი შეუნგრია და სახლი დაუტბორა.

„მეძინა, ძლიერმა ხმაურმა გამაღვიძა, სახლში წყალი მდინარესავით შემოდიოდა“, - ამბობს მიშველაძე.

სამზარეულოს კრამიტი გადახადა ძლიერმა ქარმა მის მეზობლად მცხოვრებ ქიმაძეებთან.

„სახლში წყალი ჩამოვიდა, ზემოდან წვიმდა და ქვემოთ სარდაფი მოვარდნილი ნიაღვარით ივსებოდა, - გვიყვება მიხეილ ქიმაძე და ამატებს, რომ საცხოვრებელ სახლთან ერთად ნაკვეთებიც გაუნადგურდა, - კარტოფილი სულ ზემოთ ამოყარა და სოფლის ბოლოში ჩაიტანა. მიწა ისე ქვასავით გახდა, ახლა იქ ვეღარაფერს დათესავ“.

ეზოს ნაწილი მოგლიჯა ნიაღვარმა გელაშვილებთან.

„წყალი აივანზე დაგუბდა და სახლში არ შესულა. თუკი რაიმე გვქონდა დათესილი ყველაფერი წაიღო“, - ამბობს დათო გელაშვილი.

ღვარცოფმა ეზოს ჯებირი მოარღვია სარიშვილებთანაც. მათ ეზოსთან და ნაკვეთებთან ერთად სტიქიამ სათესლედ ნაყიდი კარტოფილიც გაუფუჭა.

„კილოგრამში 3 ლარი გვქონდა გადახდილი და დათესვა ვერ მოვასწარით“, - ამბობს ზაზა სარიშვილი.

ადიგენის მუნიციპალიტეტის გამგეობაში ზარალის დამდგენი კომისია უკვე შექმნილია. მისი მონაცემებით დაზარალდა სოფლების: ჭელისა და ჭეჭლის, უდის, ფხეროსა და ბოლაჯურის ტერიტორიული ორგანოები. მწყობრიდან გამოვიდა ხუთკილომეტრნახევარი გზა. მოიშალა სოფელ ჭეჭლამდე მისასვლელი და ასევე სოფელ ჭეჭლაში მდებარე ხიდები.

ადიგენის მუნიციპალიტეტის ეკონომიკისა და ინფრასტრუქტურის სამსახურის უფროსის გოდერძი სხირტლაძის განცხადებით, ამ დროსითვის ორივე ხიდით სარგებლობა შესაძლებელია, თუმცა შეკეთებას ორივე საჭიროებს: „სილით გაივსო სარწყავი არხი ჭეჭლაში, მწყობრიდან გამოვიდა სანიაღვრე არხები“.

რაც შეეხება სასოფლო სამეურნეო სავარგულებს, ჯერ აქ მიყენებული ზარალის მასშტაბები დათვლილი არ არის.

„ზოგან მიწაა მოგლეჯილი და 100 პროცენტით განადგურებულია ნათესები, ჯერ არ ვიცით რა ფართობი დაზიანდა ჯამში“, - აცხადებს ადიგენის მუნიციპალიტეტის გამგებლის მოვალეობის დროებით შემსრულებელი ზაქარია ენდელაძე.

ადიგენის მუნიციპალიტეტის გამგეობაში ჯერ არც ის იციან, როგორ გაუმკლავდებიან მიყენებულ ზიანს.

„არ ვიცით ჩვენი ბიუჯეტიდან გამოვყოფთ თანხას თუ გარკვეული სახსრები ცენტრალური ბიუჯეტიდან გამოინახება“ - ამბობს ენდელაძე.
ადიგენის მუნიციპალიტეტის სარეზერვო ფონდში 50 ათასი ლარია გათვალისწინებული, თუმცა რამდენად შეიძლება აქედან თუნდაც გარკვეული თანხის გამოყოფა რიგი პრობლემების გადასაჭრელად, ჯერ გარკვეული არც ეს არის. ადიგენის მუნიციპალიტეტის საკრებულოს თავმჯდომარე ემზარ ენდელაძე ამბობს, რომ საბოლოოდ დაჯამებული მონაცემები რეგიონული განვითარების სამინისტროში გადაიგზავნება.

შეგახსენებთ, ადიგენს სტიქიამ 13 მაისს შეუტია. ძლიერმა წვიმამ მუნიციპალიტეტის რამდენიმე სოფელში ნათესები დატბორა. ნიაღვარს მოყოლილმა ქვა–ღორღმა კი ადიგენის ცენტრალური მაგისტრალი დააზიანა.

[თამუნა უჩიძე, ადიგენი]