ვინ შეაკეთებს ახალციხეში კორპუსის გადახდილ სახურავს

ახალციხეში N103 კორპუსის ეზოში გაწმენდითი სამუშაოები მიმდინარეობს. აღდგა ელექტრო ენერგიის მიწოდება.

ადგილზე უკვე იყო ახალციხის მუნიციპალიტეტის გამგებელი მალხაზ ჟუჟუნაძე, ასევე ეკონომიკისა და ინფრასტრუქტურის განვითარების სამსახურის უფროსი გიორგი გიქოშვილი.

ჟუჟუნაძის განცხადებით, გადახდილ სახურავს ის მშენებელი ფირმა გააკეთებს, რომელმაც აქ სამუშაოები 2012 წელს ჩაატარა.

„შპს „მელიზას“ საგარანტიო ვადა მიმდინარე წლის სექტემბრამდე აქვს, ამიტომ იგი ვალდებულია, სახურავი შეაკეთოს. თუ „მელიზა“ მოიწვევს ექსპერტიზას და დაადასტურებს, რომ სახურავი სტიქიის გამო დაზიანდა, მაშინ, ამის შემდეგ შეუძლია დახარჯული თანხის ანაზღაურება მოითხოვოს , - აცხადებს ჟუჟუნაძე და ამატებს, რომ ამის შესახებ შპს „მელიზას“ წარმომადგენლებს უკვე ესაუბრა - 2-3 დღეში, მაქსიმუმ ერთ კვირაში, სახურავს გადახურავენ“.

მიუხედავად ჟუჟნაძის განცხადებისა, ზაზა მელიქიძე ამბობს, რომ „ჯერ მომხდარზე ვერაფერს იტყვის“.

„მინაძეში ქვა-ღორღი რომ ჩამოწვა ჯერ იქ ვარ, ამიტომ ვერაფერს გეტყვით“, - განაცხადა შპს „მელიზას“ დირექტორმა და ახალციხის მუნიციპალიტეტის ახლადარჩეულმა გამგებელმა „ქართული ოცნებიდან“ ზაზა მელიქიძემ.

მისმა ფირმამ 2012 წელს „პრეზიდენტის წითელი სახურავი“ ახალციხეში 12 კურპუსში გააკეთა. ის, რომ მისი ფირმის მიერ გაკთებეულ სახურავებს არანაირი დეფექტი არ გააჩნდა, მელიქიძემ გამგეობას მიმდინარე წლის 10 ივნისს წერილობით აცნობა.

ინფრომაცია სახურავების მდგომარეობის შესახებ ყველა მშნებელ ფირმას, ვინც 2012 წელს სახურავები გადახურა, ადგილობრივმა თვითმმართველობამ მიმდინარე წლის მაისში, მას შემდეგ მოსთხოვა, რაც ქალაქში სტიქიამ საცხოვრებელ კორპუსს სახურავი მეორედ გადახადა.

ვიდრე კორპუსის სახურავი გადაიხურება მეხუთე სართულზე მცხოვრებლებს წყალი ჩასდით.

„მეხუთე სართულზე ვცხოვრობ, ძლიერი ხმა შემომესმა და გარეთ გამოვედი, მთელი სახურავი ძირს დაეცა. ახლა იმ ადგილებზე სადაც წყალი ჩამოდის ჭურჭელი გვაქვს შედგმული, - ამბობს თენგიზ კაკიაშვილი და ამატებს - მაშინ, როცა სახურავს ხურავდნენ წყალი ჩამოგვდიოდა და დავზარალდით, მაშინ ხმა არ ამოგვიღია, იმედია ყურადღებას ახლა მაინც მოგვაქცევენ“.

შეგახსენებთ, რომ 2012 წლის ივლისში მთავრობის ფონდიდან გამოყოფილი თანხით გაკეთებულ სახურავებს შორის დღეს, 6 ივლისს, N103 კორპუსის გადახდილი სახურავი რიგით მესამეა.





[sknews.ge]