რას აპირებენ სასამართლოს მიერ გამტყუნებული ადიგენის ყოფილი გამგებელი და მისი მოადგილე

ახალციხის რაიონული სასამართლოს გადაწყვეტილებას, ადიგენის მუნიციპალიტეტის ყოფილი თანამშრომლები სააპელაციო სასამართლოში გაასაჩივრებენ.

ადიგენის მუნიციპალიტეტის ყოფილი გამგებელი სიმონ პარუნაშვილი აცხადებს, რომ იგი უდანაშაულოა და ამას აუცილებლად დაამტკიცებს: „დამნაშავედ მცნეს ერთ–ერთ ეპიზოდში, სადაც ინტერესთა კონფლიქტს გვედავებოდნენ. კომისიის ყველა წევრი აბსოლუტურად მართალი ვართ, ყველაფერი კანონის დაცვით გავაკეთეთ“.

მოსამართლე გიორგი ლონდარიძის გადაწყვეტილებას პარუნაშვილი ცუდ პრეცენდენტად აფასებს და ამბობს, რომ ასე იგი მართლმსაჯულებას ასამარებს.

ადიგენის ყოფილი გამგებელი, კვლავ გამგებლობისთვის იბრძვის. იგი „ერთიანი ნაციონალური“ მოძრაობიდან ადიგენის მუნიციპალიტეტის გამგებლობის კანდიდატადაა დასახელებული. პარუნაშვილის თქმით, სასამართლოს გადაწყვეტილება მის წინასაარჩევნო კამპანიას ხელს ვერ შეუშლის და გამარჯვებისთვის ბრძოლას გააგრძელებს.

„არ ვიცი, მოსამართლის გადაწყვეტილება მოსახლეობაზე რამდენად იმოქმედებს, მაგრამ ეს მე ხელს ვერაფერში შემიშლის“, – ამბობს პარუნაშვილი.

ასევე, ადგილობრივი თვითმმართველობის არჩევნებში ადიგენის მაჟორ დეპუტატად იყრის კენჭს პარუნაშვილის ყოფილი მოადგილე რატი ტატალაშვილიც. მისთვის სასამართლოს გადაწყვეტილება მოულოდნელი იყო: „ვიმედოვნებდი, რომ სასამართლო ამ პირობებშიც კი მიიღებდა სამართლიან გადაწყვეტილებას, მაგრამ სამწუხაროდ შევცდი. მნიშვნელობა არ აქვს ეს ჯარიმაა თუ სხვა რამ, შეიძლება, პირობითად სასჯელის სახედ ერთი ლარი ყოფილიყო შეფარდებული. მთავარია, რომ გამამტყუნებელი განაჩენი დადგა“.

მესამე მსჯავრდებულმა, ადიგენის მუნიციპალიტეტის გამგეობის ინფრასტრუქტურის სამსახურის ყოფილმა უფროსმა ჯემალ იაკობაძემ, სასამართლო პროცესის დასრულების შემდეგ, კომენტარი არ გააკეთა. უკომენტაროდ დატოვა სასამართლოს შენობა პროკურორმა რევაზ მამადაშვილმაც.
სიმონ პარუნაშვილის ადვოკატი, გიორგი გელხაური კი აცხადებს, რომ ახალციხის რაიონული სასამართლოს გადაწყვეტილებას თბილისის სააპელაციო სასამართლო აუცილებლად შეცვლის და მსჯავრდებულებს უდანაშაულოდ ცნობს.

„აბსოლუტურად გამამართლებელი განაჩენი უნდა დამდგარიყო. მოსამართლის გადაწყვეტილებას არ ვეთანხმებით. წინასწარ იყო გადაწყვეტილი, რომ ეს საქმე ასე დამთავრდებოდა“, – აცხადებს გელხაური.

შეგახსენებთ, რომ ადიგენის მუნიციპალიტეტის გამგეობის ყოფილ თანამშრომლებს ბრალი სსკ–ის 332-ე მუხლის სხვადასხვა ეპიზოდში ედებოდათ, რაც სამსახურეობრივი უფლებამოსილების ბოროტად გამოყენებას გუსლიხმობდა. თუმცა, ახალციხის რაიონული სასამართოს მოსამართლემ გიორგი ლონდარიძემ გამგეობის ყოფილი თანამშრომლები 332–ე მუხლის ყველა ეპიზოდში უდანაშაულოდ ცნო. მოსამართლემ საქმე გადააკვალიფიცირა და ადიგენის მუნიციპალიტეტის ყოფილი თანამშრომლები 342–ე მუხლის პირველი ნაწილით გათვალისწინებული დანაშაულის ჩადენაში, სამსახურეობრივ გულგრილობაში დაადანაშაულა.

[თამუნა უჩიძე, ახალციხე]