ყოფილმა გამგებელმა ადიგენის გამგეობას ადმინისტრაციული დავა მოუგო

ახალციხის რაიონულმა სასამართლომ სიმონ პარუნაშვილის სასარჩელო მოთხოვნა სრულად, მისი ყოფილი კოლგების: რატი ტატალაშვილისა და ჯემალ იაკობაძის მოთხოვნა კი ნაწილობრივ დააკმაყოფილა.

სიმონ პარუნაშვილი იძულებით განაცდურის ანაზღაურებას, იაკობაძე და ტატალაშვილი კი იძულებით განაცდურის ანაზღაურებასთან ერთად, თანამდებობებზე აღდგენასაც ითხოვდნენ.

სასამართლოს გადაწყვეტილებით, ადიგენის გამგეობის ყოფილ თანამშრომლებს 11 თვის განმავლობაში იძულებით განაცდურ საათებს ადიგენის ადგილობრივი თვიმმართველობა აუნაზღაურებს. სიმონ პარუნაშვილს 27 000, რატი ტატალაშვილს 13 000 და ჯემალ იაკობაძეს კი 10 000 ლარი აუანზღაურდება.

რაც შეეხება თანამდებობეზე აღდგენას, სასამართლომ ეს მოთხოვნა არ დააკმაყოფილა.

შეგახსენებთ, რომ სიმონ პარუნაშვილი, ასევე რატი ტატალაშვილი და ჯემალ იაკობაძე იძულებით განაცდურის ანაზღაურებას ადგილობრივ ხელისუფლებას სთხოვდნენ, თუმცა მათ ადიგენის მუნიციპალიტეტის გამგეობიდან უარი მიიღეს. ამის შემდეგ მიმართეს მათ სასამართლოს.

ადიგენის მუნიციპალიტეტის გამგეობის ყოფილ თანამშრომლებს ბრალი სსკ–ის 332-ე მუხლის სხვადასხვა ეპიზოდში ედებოდათ, რაც სამსახურეობრივი უფლებამოსილების ბოროტად გამოყენებას გულისხმობდა. ახალციხის რაიონული სასამართლოს მოსამართლემ გიორგი ლონდარიძემ გამგეობის ყოფილი თანამშრომლები 332–ე მუხლის ყველა ეპიზოდში უდანაშაულოდ სცნო. თუმცა, მოსამართლემ საქმე გადააკვალიფიცირა და ადიგენის მუნიციპალიტეტის ყოფილი თანამშრომლები 342–ე მუხლის პირველი ნაწილით გათვალისწინებული დანაშაულის ჩადენაში, სამსახურეობრივ გულგრილობაში დაადანაშაულა.

ლონდარიძემ საქმეში მყოფი სამივე ბრალდებული: ადიგენის ყოფილი გამგებელი სიმონ პარუნაშვილი, ადიგენის მუნიციპალიტეტის გამგეობის საფინანსო სამსახურის ყოფილი უფროსი ჯემალ იაკობაძე და ადიგენის მუნიციპალიტეტის გამგებლის ყოფილი მოადგილე რატი ტატალაშვილი, 3000–3000 ლარით დააჯარიმა.

სააპელაციო სასამართლომ ლონდარიძის გადაწყვეტილება გააბათილა და ადიგენის მუნიციპალიტეტის გამგეობის ყოფილი თანამშრომლები უდანაშაულოდ ცნო. უზენაესმა სასამართლომ კი აღნიშნული გადაწყვეტილება ძალაში დატოვა.

[თამუნა უჩიძე, ადიგენი]