ადიგენის გამგეობის ყოფილი თანამშრომლები იძულებით განაცდურის მიღებას სასამართლოს გზით ეცდებიან

ადიგენის მუნიციპალიტეტის ყოფილი გამგებლის სიმონ პარუნაშვილის განცხადებით, მან და მისმა ყოფილმა კოლეგებმა წერილობით მიამრთვაზე, მათთვის იძულებით განაცდური აენაზღაურებინათ, უარი მიიღეს.

„მიზეზად ასახელებენ იმას, რომ თქვენ ახალციხის რაიონულმა სასამართლომ გადაგაყენათ თანამდებობებიდან, ამაში ადიგენის მუნიციპალიტეტის გამგეობის ბრალეულობა არ არის, ამიტომ იძულებით განაცდურს ჩვენ ვერ აგინაზღაურებთო“, – ამბობს პარუნაშვილი.

მისი თქმით, იგი ყოფილ კოლეგებთან ერთად ახალციხის რაიონულ სასამართლოში შესატანად სარჩელს ამზადებს. იძულებით განაცდურის მიღებას ადიგენის გამგეობის ყოფილი თანამშრომლები სასამართლოს გზით ეცდებიან.

შეგახსენებთ, რომ ადიგენის მუნიციპალიტეტის გამგეობის ყოფილ თანამშრომლებს ბრალი სსკ–ის 332-ე მუხლის სხვადასხვა ეპიზოდში ედებოდათ, რაც სამსახურეობრივი უფლებამოსილების ბოროტად გამოყენებას გულისხმობდა. ახალციხის რაიონული სასამართლოს მოსამართლემ გიორგი ლონდარიძემ გამგეობის ყოფილი თანამშრომლები 332–ე მუხლის ყველა ეპიზოდში უდანაშაულოდ სცნო. თუმცა, მოსამართლემ საქმე გადააკვალიფიცირა და ადიგენის მუნიციპალიტეტის ყოფილი თანამშრომლები 342–ე მუხლის პირველი ნაწილით გათვალისწინებული დანაშაულის ჩადენაში, სამსახურეობრივ გულგრილობაში დაადანაშაულა.

ლონდარიძემ საქმეში მყოფი სამივე ბრალდებული: ადიგენის ყოფილი გამგებელი სიმონ პარუნაშვილი, ადიგენის მუნიციპალიტეტის გამგეობის საფინანსო სამსახურის ყოფილი უფროსი ჯემალ იაკობაძე და ადიგენის მუნიციპალიტეტის გამგებლის ყოფილი მოადგილე რატი ტატალაშვილი, 3000–3000 ლარით დააჯარიმა.

სააპელაციო სასამართლომ ლონდარიძის გადაწყვეტილება გააბათილა და ადიგენის მუნიციპალიტეტის გამგეობის ყოფილი თანამშრომლები უდანაშაულოდ ცნო. უზენაესმა სასამართლომ კი აღნიშნული გადაწყვეტილება ძალაში დატოვა.

[თამუნა უჩიძე, ადიგენი]