რაში გაამტყუნა სასამართლომ ადიგენის ყოფილი გამგებელი

ადიგენის მუნიციპალიტეტის გამგეობის ყოფილ თანამშრომლებს ბრალი სსკ–ის 332-ე მუხლის სხვადასხვა ეპიზოდში ედებოდათ, რაც სამსახურეობრივი უფლებამოსილების ბოროტად გამოყენებას გულისხმობდა. ახალციხის რაიონული სასამართლოს მოსამართლემ გიორგი ლონდარიძემ გამგეობის ყოფილი თანამშრომლები 332–ე მუხლის ყველა ეპიზოდში უდანაშაულოდ ცნო. თუმცა, მოსამართლემ საქმე გადააკვალიფიცირა და ადიგენის მუნიციპალიტეტის ყოფილი თანამშრომლები 342–ე მუხლის პირველი ნაწილით გათვალისწინებული დანაშაულის ჩადენაში, სამსახურეობრივ გულგრილობაში დაადანაშაულა.

ლონდარიძემ მსჯავრდებულები დამნაშავედ ცნო შპს „ადიგენი 2009“–ის ეპიზოდში, რაც ინტერესთა კონფლიქტს გულისხმობდა. უფრო კონკრეტულად, "ადიგენი 2009", რომელმაც ტენდერში გაიმარჯვა, ადიგენის მუნიციპალიტეტის გამგეობის იმდროინდელი თანამშრომლისა და სატენდერო კომისიის ერთ–ერთი წევრის გელა აღლემაშვილის 100%–იან მფლობელობაში იყო. პროკურატურის მტკიცებით, კომისიის ყველა წევრი ვალდებული იყო განეცხადებინა, რომ აღლემაშვილი ინტერესთა კონფლიქტში იყო და მისი დისკვალიფიკაცია მოეხდინა, მაგრამ არცერთმა მათგანმა ეს არ გააკეთა. შედეგად კი აღლემაშვილმა გამორჩენა 54 ათასი ლარი მიიღო. შეგახსენებთ, ამ საქმეში ერთ–ერთი ბრალდებული გელა აღლემაშვილიც იყო, თუმცა, მან დანაშაული აღიარა და სასამართლომ განრიდება გაუფორმა.


შეგახსენებთ, რომ 9–თვიანი სასამართლო პროცესების შემდეგ, დღეს, 7 მაისს, ახალციხის რაიონული სასამართლოს მოსამართლემ გიორგი ლონდარიძემ ადიგენის მუნიციპალიტეტის ყოფილ გამგებელს სიმონ პარუნაშვილს, მის ყოფილ მოადგილეს რატი ტატალაშვილსა და გამგეობის ინფრასტრუქუტრის სამსახურის ყოფილ უფროსს ჯემალ იაკობაძეს, სასჯელის სახედ ჯარიმა 3000–3000 ლარი დააკისრა და ერთი წლით სახელმწიფო სამსახურსა და ადგილობრივი თვითმმართველობის ორგანოში დანიშვნითი თანამდებობის დაკავების უფლება ჩამოართვა.

„ის, რაშიც პროკურატურა სამივე მათგანს ედავებოდა, მოსამართლემ გაამართლა და საქმე გადააკვალიფიცირა“, – აცხადებს სიმონ პარუნაშვილის ადვოკატი გიორგი გელხაური.

[თამუნა უჩიძე, ახალციხე]