ადიგენის ყოფილი გამგებლის საქმე უზენაესმა სასამართლომ წარმოებაში არ მიიღო

ადიგენის მუნიციპალიტეტის ყოფილ გამგებელს სიმონ პარუნაშვილს უზენაესი სასამართლოს გადაწყვეტილება ჯერ არ ჩაბარებია, თუმცა, მისთვის ცნობილია, რომ უზენაესმა პროკურატურის საჩივარი წარმოებაში არ მიიღო.

სიმონ პარუნაშვილის თქმით, მას შემდეგ რაც გადაწყვეტილებას მიიღებს, ადიგენის მუნიციპალიტეტის გამგეობისგან განაცდური საათების ანაზღაურებას მოითხოვს, შემდეგ კი ზიანის ანაზღაურების შესახებ იდავებს.

"თვითმმართველობის კოდექსში პირდაპირ წერია, თუ გამამართლებელი განაჩენი დადგა გამგებლის ან საკრებულოს თავმჯდომარის მიმართ, უნდა აუნაზღაურდეს განაცდური საათი. როგორც მე ვიცი, უნდა შევიტანო განცხადება გამგეობაში, უნდა ჩამირიცხონ თანხა, ხოლო ზიანზე ცალკე უნდა ვიდავო სასამართლოში", – ამბობს სიმონ პარუნაშვილი და ამატებს, რომ განაცდური საათები მისი დაკავებიდან დაახლოებით შვიდ–რვა თვეს გულისხმობს.

შეგახსენებთ, რომ სააპელაციო სასამართლომ პარუნაშვილის საქმეზე გამამართლებელი განაჩენი 5 თებერვლას გამოიტანა.

ადიგენის მუნიციპალიტეტის გამგეობის ყოფილ თანამშრომლებს ბრალი სსკ–ის 332-ე მუხლის სხვადასხვა ეპიზოდში ედებოდათ, რაც სამსახურეობრივი უფლებამოსილების ბოროტად გამოყენებას გულისხმობდა. ახალციხის რაიონული სასამართლოს მოსამართლემ გიორგი ლონდარიძემ გამგეობის ყოფილი თანამშრომლები 332–ე მუხლის ყველა ეპიზოდში უდანაშაულოდ სცნო. თუმცა, მოსამართლემ საქმე გადააკვალიფიცირა და ადიგენის მუნიციპალიტეტის ყოფილი თანამშრომლები 342–ე მუხლის პირველი ნაწილით გათვალისწინებული დანაშაულის ჩადენაში, სამსახურეობრივ გულგრილობაში დაადანაშაულა.

ლონდარიძემ საქმეში მყოფი სამივე ბრალდებული: ადიგენის ყოფილი გამგებელი სიმონ პარუნაშვილი, ადიგენის მუნიციპალიტეტის გამგეობის საფინანსო სამსახურის ყოფილი უფროსი ჯემალ იაკობაძე და ადიგენის მუნიციპალიტეტის გამგებლის ყოფილი მოადგილე რატი ტატალაშვილი, 3000–3000 ლარით დააჯარიმა.

[თამარ თოთაძე, ახალციხე]