ადიგენის ყოფილი გამგებელი სააპელაციო სასამართლომ გაამართლა

სააპელაციო სასამართლომ განაჩენი დღეს, 5 თებერვალს გამოაცხადა. სასამართლომ ადიგენის მუნიციპალიტეტის ყველა თანამშრომელი ყველა ეპიზოდში უდანაშაულოდ სცნო და ახალციხის რაიონული სასამართლოს გადაწყვეტილება ძალაში არ დატოვა.

"დღეს მსჯავრდებულებმა საბოლოო სიტყვები წარმოთქვეს და ამის შემდეგ მოსამართლემ განაჩენი გამოიტანა.შპს "ნამქერისა" და შპს "ადიგენი" 2009-ის" ეპიზოდებში ადიგენის გამგეობის ყველა ყოფილი თანამშრომელი გაამართლეს", - ამბობს ადვოკატი ეკა აბაშიძე.

მისი თქმით, პროკურატურას ამ გადაწყვეტილების უზენაეს სასამართლოში გასაჩივრებისთვის ერთი თვის ვადა აქვს. გაასაჩივრებს თუ არა პროკურატურა სააპელაციო სასამართლოს გადაწყვეტილებას ჯერ უცნობია.

"ჯერ არ ვიცი გავასაჩივრებთ თუ არა", - გვითხრა პროკურორმა მამუკა ქომოშვილმა.

შეგახსენებთ, რომ ადიგენის მუნიციპალიტეტის გამგეობის ყოფილ თანამშრომლებს ბრალი სსკ–ის 332-ე მუხლის სხვადასხვა ეპიზოდში ედებოდათ, რაც სამსახურეობრივი უფლებამოსილების ბოროტად გამოყენებას გულისხმობდა. ახალციხის რაიონული სასამართლოს მოსამართლემ გიორგი ლონდარიძემ გამგეობის ყოფილი თანამშრომლები 332–ე მუხლის ყველა ეპიზოდში უდანაშაულოდ სცნო. თუმცა, მოსამართლემ საქმე გადააკვალიფიცირა და ადიგენის მუნიციპალიტეტის ყოფილი თანამშრომლები 342–ე მუხლის პირველი ნაწილით გათვალისწინებული დანაშაულის ჩადენაში, სამსახურეობრივ გულგრილობაში დაადანაშაულა.

ლონდარიძემ საქმეში მყოფი სამივე ბრალდებული: ადიგენის ყოფილი გამგებელი სიმონ პარუნაშვილი, ადიგენის მუნიციპალიტეტის გამგეობის საფინანსო სამსახურის ყოფილი უფროსი ჯემალ იაკობაძე და ადიგენის მუნიციპალიტეტის გამგებლის ყოფილი მოადგილე რატი ტატალაშვილი, 3000–3000 ლარით დააჯარიმა.

[თამუნა უჩიძე, ახალციხე]