ადიგენის გამგებელს სასამართლომ ჯარიმა დააკისრა

ახალციხის რაიონული სასამართლოს მოსამართლემ გიორგი ლონდარიძემ ადიგენის მუნიციპალიტეტის გამგეობის ყოფილი თანამშრომლების საქმეზე გადაწყვეტილება დღეს, 7 მაისს, რამდენიმე წუთის წინ გამოაცხადა.

მოსამართლემ საქმეში მყოფი სამივე ბრალდებული: ადიგენის ყოფილი გამგებელი სიმონ პარუნაშვილი, ადიგენის მუნიციპალიტეტის გამგეობის საფინანსო სამსახურის ყოფილი უფროსი ჯემალ იაკობაძე და ადიგენის მუნიციპალიტეტის გამგებლის ყოფილი მოადგილე რატი ტატალაშვილი, გარკვეულ ეპიზოდებში დამნაშავედ ცნო და ჯარიმა 3000–3000 ლარი დააკისრა.

გარდა ამისა, მოსამართლის გადაწყვეტილებით, სამივე მათგანს ერთი წლით ჩამოართვა სახელმწიფო სამსახურსა და ადგილობრივი თვითმმართველობის ორგანოში დანიშვნითი თანამდებობის დაკავების უფლება.

შეგახსენებთ, სიმონ პარუნაშვილი, "ერთიანმა ნაციონალურმა მოძრაობამ", ადიგენის მუნიციპალიტეტში გამგებლობის კანდიდატად დაასახელა. რატი ტატალაშვილი კი საარჩევნო სიაშია.

შეგახსენებთ, ადიგენის მუნიციპალიტეტის ყოფილი გამგებელი სიმონ პარუნაშვილი გასული წლის 27 აგვისტოს, ფინანსთა სამინისტროს საგამოძიებო სამსახურის საგამოძიებო დეპარტამენტის სამცხე-ჯავახეთის სამმართველომ დააკავა.

მასთან ერთად სისხლის სამართლის კოდექსის 332-ე მუხლის სხვადასხვა ეპიზოდში ბრალი ედებოდათ ადიგენის მუნიციპალიტეტის გამგეობის საფინანსო სამსახურის ყოფილ უფროსს ჯემალ იაკობაძეს, ადიგენის მუნიციპალიტეტის გამგეობის ეკონომიკისა და ინფრასტრუქტურის სამსახურის ყოფილ მთავარ სპეციალისტს გელა აღლემაშვილს (რომელთანაც განრიდება გაფორმდა) და ადიგენის მუნიციპალიტეტის გამგებლის ყოფილ მოადგილეს რატი ტატალაშვილს.

დეტალურად, რა ეპიზოდებში ცნეს სამივე მათგანი დამნაშავეებად და რა ეპიზოდებში გაამართლეს, დეტალებს რამდენიმე წუთში გიამბობთ.

[sknews.ge]