პროკურატურამ ადიგენის ყოფილი გამგებლის საქმე უზენაესში გაასაჩივრა

უზენაეს სასამართლოში დაცვის მხარემ უკვე შესაგებელიც წარადგინა. როგორც ადვოკატი ეკა აბაშიძე აცხადებს, შესაძლოა სასამართლომ მათ დაუსწრებლადაც იმსჯელოს და გადაწყვეტილება ისე გამოიტანოს. თუმცა, ჯერ ისაა გასარკვევი უზენაესი სასამართლო ამ საქმეს წარმოებაში მიიღებს თუ არა.

„სააპელაციო სასამართლომ ისეთი დასაბუთებული გადაწყვეტილება გამოიტანა, რომ შესაძლოა უზენაესმა წარმოებაში არც მიიღოს“, – ამბობს აბაშიძე.

შეგახსენებთ, რომ სააპელაციო სასამართლომ პარუნაშვილის საქმეზე გამამართლებელი განაჩენი 5 თებერვლას გამოიტანა.

ადიგენის მუნიციპალიტეტის გამგეობის ყოფილ თანამშრომლებს ბრალი სსკ–ის 332-ე მუხლის სხვადასხვა ეპიზოდში ედებოდათ, რაც სამსახურეობრივი უფლებამოსილების ბოროტად გამოყენებას გულისხმობდა. ახალციხის რაიონული სასამართლოს მოსამართლემ გიორგი ლონდარიძემ გამგეობის ყოფილი თანამშრომლები 332–ე მუხლის ყველა ეპიზოდში უდანაშაულოდ სცნო. თუმცა, მოსამართლემ საქმე გადააკვალიფიცირა და ადიგენის მუნიციპალიტეტის ყოფილი თანამშრომლები 342–ე მუხლის პირველი ნაწილით გათვალისწინებული დანაშაულის ჩადენაში, სამსახურეობრივ გულგრილობაში დაადანაშაულა.

ლონდარიძემ საქმეში მყოფი სამივე ბრალდებული: ადიგენის ყოფილი გამგებელი სიმონ პარუნაშვილი, ადიგენის მუნიციპალიტეტის გამგეობის საფინანსო სამსახურის ყოფილი უფროსი ჯემალ იაკობაძე და ადიგენის მუნიციპალიტეტის გამგებლის ყოფილი მოადგილე რატი ტატალაშვილი, 3000–3000 ლარით დააჯარიმა.

[თამუნა უჩიძე, ახალციხე]