ბუღაშენში ახალი სკოლა შენდება

ბუღაშენში ახალი სკოლის მშნებლობა საქართველოს განათლებისა და მეცნიერების მინისტრმა თამარ სანიკიძემ სამცხე-ჯავახეთის გუბერნატორთან ერთად მოინახულა. მინისტრი სოფლის მოსახლეობას, მასწავლებლებსა და მოსწავლეებსაც შეხვდა.

შეგახსენებთ, რომ ბუღაშენში ამ დრომდე 1957-1959 წლებში აშენებული სკოლა ფუნქციონირებს, რომელიც გასული საუკუნის 90-იანი წლების შემდეგ აღარ გარემონტებულა. სკოლის ერთ-ერთ კორპუსში განათლებისა და მეცნიერების სამინისტრომ გაკვეთილების ჩატარება აკრძალა. სასწავლო პროცესი შენობის იმ ნაწილში მიმდინარეობს, რომელიც ნაკლებად ავარიულია.

როგორც განათლებისა და მეცნიერების სამინისტროში აცხადებენ, მოსწავლეთა უსაფრთხოების დაცვის მიზნით, სამინისტროს სამეცნიერო და საგანმანათლებლო ინფრასტრუქტურის განვითარების სააგენტომ მიზანშეწონილად ჩათვალა ახალი სკოლის მშენებლობის დასრულებამდე, მოსწავლეთა შენობის უსაფრთხო ნაწილში გადაყვანა და ავარიული ნაწილის სრული იზოლირება განეხორციელებინა. ახალი სკოლა გაცილებით უკეთეს და ხელსაყრელ ადგილზე შენდება, სკოლას ექნება თანამედროვე გათბობის სისტემა. კლას-კაბინეტები თანამედროვე სასკოლო მერხებით, დაფებითა და ახალი კომპიუტერებით აღიჭურვება.

სასკოლო ინფრასტრუქტურის განვითარების პროექტის ფარგლებში, მთელი საქართველოს მასშტაბით 9 ახალი სკოლა შენდება. სამინისტროში აცხადებენ, რომ მომავალი სასწავლო წლისთვის 100-ობით სკოლა გარემონტდება და თანამედროვედ აღიჭურვება.



[sknews.ge]