ბუღაშენში პირველი ენერგოეფექტური სკოლა აშენდა

საქართველოს განათლების მინისტრმა თამარ სანიკიძემ სოფელ ბუღაშენში აშენებული ახალი სკოლა სამინისტროს ინფრასტრუქტურის სამსახურისა და ადგილობრივი თვითმმართველობის წარმომადგენლებთან ერთად მოინახულა.

ბუღაშენში აშენებული სკოლა 120 მოსწავლეზეა გათვლილი. სკოლა ადაპტირებულია სპეციალური საგანმანათლებლო საჭიროების მქონე მოსწავლეებისთვის, აღჭურვილია თანამედროვე სასკოლო და საოფისე ინვენტარით, აქვს თანამედროვე გათბობის სისტემა, ბიბლიოთეკა, ექიმის კაბინეტი და ღია სპორტული მოედანი.

„აღსანიშნავია, რომ ეთნიკური უმცირესობებით დასახლებულ სოფელში, მკაცრი კლიმატური პირობებია და ზამთარში აქ ტემპერატურა მინუს ოცდაათ გრადუსს აღწევს. ამის გათვალისწინებით, ბუღაშენის საჯარო სკოლა ერთ-ერთი პირველია, რომლის ასაშენებლადაც გამოყენებული იქნა ენერგოეფექტური მასალა, რომელიც დაზოგავს ენერგიას და გათბობისთვის გაწეული ხარჯი მნიშვნელოვნად შემცირდება“, – აცხადებენ საქართველოს განათლების სამინისტროში.



შეგახსენებთ, ბუღაშენში სკოლა 1957–1959 წლებში იყო აშენებული და 90-იანი წლების შემდეგ აღარ გარემონტებულა.სკოლა ავარიული იყო და სასწავლო პროცესი რისკის ქვეშ მიმდინარეობდა.

განათლების სამინისტროს ინფორმაციით, 2013 წლიდან დღემდე 9 საჯარო სკოლისა და 1 პროფესიული სასწავლებლის მშენებლობა განხორციელდა. მიმდინარეობს 11 საჯარო სკოლის მშენებლობა და 18 საჯარო სკოლის პროექტირება, აქედან 4 საჯარო სკოლის მშენებლობა 2015 წელსვე დაიწყება, დანარჩენი 14 სკოლა 2016 წელს აშენდება.

2015 წლიდან დღემდე, რეაბილიტაცია ჩაუტარდა 1089 საჯარო სკოლას, ახალი სასწავლო წლისთვის კიდევ 225 სკოლაში განხორციელდება სარეაბილიტაციო სამუშაოები. მოეწყო 100 სამედიცინო ოთახი, 187 სკოლაში სამედიცინო კაბინეტების მოწყობა მიმდინარეობს.



[ნინო ნარიმანიშვილი, ახალქალაქი]