ბუღაშენის სკოლა ნგრევის პირზეა

სოფლებში: ჩამდურა, ალათუმანი, კორხი, ვაჩიანი, პატარა სამსარი, ბარალეთი(პირველი სკოლა) და ახალქალაქის მე-2 რუსული სკოლაში სარემონტო სამუშაოები მალე დაიწყება.

- ’’შეიცვლება კარი, ფანჯრები, კოსმეტიკური რემონტი, გამაგრდება შენობა, ერთი სიტყვით, ეს ისეთი სამუშაოებია, რომელიც სკოლას ესაჭიროება’’, - განმარტა ახალქალაქის საგანმანათლებლო რესურსცენტრის დირექტორმა ნარცის კარაპეტიანმა.

სარემონტო სამუშაოებმა გვერდი აუარა ავარიულ სკოლებს. ერთ-ერთი ასეთი სკოლა სოფელ ბუღაშენშია.

ბუგაშენის სკოლა 1959 წელს აშენდა და არ გარემონტებულა საბჭოთა კავშირის დაშლის შემდეგ. სკოლის დირექტორი თადევოს პალიანი ამბობს, რომ სკოლის შენობა საფრთხეს უქმნის იმ 100 მოსწავლეს, რომლებიც იქ სწავლობენ და ცხადია, იქ მომუშავე პერსონალსაც.

- ’’სკოლა ორი შენობისაგან შედგება. ერთი მეორესთან შედარებით შეიძლება უკეთესად ჩაითვალოს. იქ, რომელიც უფრო ცუდ მდგომარეობაშია, არც კარებია და არც ფანჯრები, გვათოვს და გვაწვიმს’’, - ამბობს სკოლის დირექტორი და იმედი, აქვს, რომ ინფორმაციის გახმაურების შემდეგ მაინც მიიღებს მცირე დახმარებას.

ახალქალაქის მუნიციპალიტეტის საკრებულომ სამცხე-ჯავახეთის სამხარეო ადმინისტრაციას განცხადებით მიმართა და სთხოვა, წარადგინონ სოფელ ბუგაშენის სკოლის პრობლემა საქართველოს განათლებისა და მეცნიერების სამინისტროში.

- ’’პასუხი ჯერ არ მიგვიღია, მაგრამ იმედი მაქვს, რომ ეს საკითხი უახლოეს მომავალში დადებითად გადაწყდება’’, - ამბობს ახალქალაქის მუნიციპალიტეტის საკრებულოს თავმჯდომარე ჰამლეტ მოვსესიანი.

სკოლის შენობა იმდენად ცუდ მდგომარეობაშია, რომ სარემონტო სამუშაოები არ უშველის. შენობა უნდა დაინგრეს და თავიდან აშენდეს. სავარაუდოდ, ამის გამო ვერ მოხვდა იგი გასარემონტებელ სკოლათა სიაში.

ახალქალაქის საგანმანათლებლო რესურსცენტრის დირექტორის თქმით, ბუგაშენის სკოლის პრობლემა წარდგენილია საქართველოს განათლებისა და მეცნიერების სამინისტროში და პასუხს ელოდებიან. რამდენი სკოლა აშენდება და სად, სახელმწიფოს დონეზე უნდა გადაწყდეს.

[აღუნიკ აივაზიანი, ახალქალაქი]