არალში ახალი სკოლა აშენდება

ძველი სკოლის დემონტაჟი არალში. 12 თებერვალი, 2015წ. ინგა ვარდიძის ფოტო

ახალი სკოლა ძველი სკოლის ადგილას უნდა აშენდეს. შენობის დემონტაჟი თითქმის სრულდება. ვიდრე ახალი სკოლა აშენდება, მოსწავლეები დროებით, სოფელში მდებარე მართლმადიდებლური და კათოლიკური სამრევლო სკოლების შენობებში გადაანაწილეს.

არალში ახალი სკოლა საგანმანათლებლო და სამეცნიერო ინფრასტრუქტურის განვითარების სააგენტოს დაფინანსებით უნდა აშენდეს. სამუშაოებს „სივილ ქონსტრაქშენი“ შეასრულებს, სააგენტომ კომპანიასთან ხელშეკრულება უკვე გააფორმა.

როგორც საქართველოს მეცნიერებისა და განათლების სამინისტროში განმარტავენ, ორსართულიანი, 192 მოსწავლეზე გათვლილი სკოლის მშენებლობისთვის, საგანმანათლებლო და სამეცნიერო ინფრასტრუქტურის განვითარების სააგენტომ, 1.698.000 ლარი გამოყო.

„ამჟამად მიმდინარეობს მოსამზადებელი სამუშაოები და სკოლის მშენებლობა უახლოეს პერიოდში დაიწყება“, – ამბობს საქართველოს განათლებისა და მეცნიერების სამინისტროს საზოგადოებასთან ურთიერთობის სამსახურის წარმომადგენელი ნატა ასათიანი.

ხელშეკრულების თანახმად არალში სკოლის მშენებლობა 2016 წლის 20 იანვარს უნდა დასრულდეს.

[მანანა სარაშვილი, ახალციხე]