თამარ სანიკიძემ არალში სკოლის მშენებლობის პროცესი მოინახულა

სოფელ არალში 200 მოსწავლეზე გათვლილი, თანამედროვე სტანდარტების სკოლის მშენებლობა რამდენიმე კვირის წინ დაიწყო. ახალი სკოლა ძველი სკოლის ადგილზე შენდება.

როგორც თამარ სანიკიძე ამბობს, სკოლას ექნება თანამედროვე გათბობის სისტემა, სპორტული და სააქტო დარბაზები, თავისი დამხმარე სათავსოებით, ბიბლიოთეკა, ექიმის კაბინეტი, საინფორმაციო ტექნოლოგიებისა და საბუნებისმეტყველო კლას – კაბინეტები, ღია სპორტული მოედანი. შენობა ადაპტირებული იქნება სპეციალური საგანმანათლებლო საჭიროების მქონე მოსწავლეებისთვის. იგეგმება სკოლის ტერიტორიის გამწვანება და კეთილმოწყობა.

„როგორც ვიცი, წლების განმავლობაში სკოლა საუკუნოვანი ხის შენობაში ფუნქციონირებდა, სადაც არ არსებობდა სასკოლო ინფრასტრუქტურა. ახალი სკოლის მშენებლობა კი სოფლის მოსახლეობისთვის აუხდენელ ოცნებად მიიჩნეოდა“, – განაცხადა განათლების მინისტრმა.

განათლების სამინისტროს ინფორმაციით, ბოლო სამი წლის განმავლობაში სამცხე – ჯავახეთის რეგიონში 60 – მდე საჯარო სკოლას ჩაუტარდა რეაბილიტაცია, გაზიფიცირდა 40 – მდე სკოლა, ახალქალაქის მუნიციპალიტეტის სოფელ ბუღაშენში უკვე დასრულდა ახალი, თანამედროვე სკოლის მშენებლობა.

[მანანა სარაშვილი, ადიგენი]