სამცხე-ჯავახეთის გუბერნიაში გასაუბრება დაიწყო

სამცხე-ჯავახეთის სამხარეო ადმინისტრაციაში 14 აპრილს გასაუბრება ორ პოზიციაზე ტარდება. დღეს გასაუბრებას ის კონკურსანტები გაივლიან, რომლებსაც განაცხადი სახელმწიფო რწმუნებულის-გუბერნატორის აპარატის მთავარი სპეციალისტისა და სპეციალისტის ვაკანსიებზე აქვთ შეტანილი. სამხარეო ადმინისტრაციაში გასაუბრება დილის 10:00 საათზე დაიწყო.

სამცხე-ჯავახეთის სახელმწიფო რწმუნებულის-გუბერნატორის აპარატის უფროსის გიორგი მიქელაძის თქმით, მთავარი სპეციალისტის ვაკანსიაზე 7, სპეციალისტის ვაკანსიაზე კი 22 კანდიდატია.

ხვალ, 15 აპრილს კი გასაუბრება სახელმწიფო რწმუნებულის-გუბერნატორის აპარატის უფროსი სპეციალისტების (საქმისმწარმოებლის და იურისტის) ვაკანსიებზე ჩატარდება.

შეგახსენებთ, რომ სამხარეო ადმინისტრაციაში მოხელეთა შესარჩევი კონკურსი 18 მარტს გამოცხადდა. საბუთების მიღება 27 მარტს დასრულდა. 25 ვაკანსიაზე სულ 378 განაცხადი შევიდა. მეორე ეტაპზე კი 275 კანდიდატი გადავიდა. კანდიდატებს სამცხე-ჯავახეთის სამხარეო ადმინისტრაციაში შექმნილი საკონკურსო კომისია შარჩევს. კომისიის თავმჯდომარე სახელმწიფო რწმუნებული-გუბერნატორი აკაკი მაჭუტაძეა, მოადგილე კი მისი, როგორც გუბერნატორის, პირველი მოადგილე ავთანდილ კაჭკაჭაშვილი. კომისიის წევრები არიან შემოსავლების სამსახურის მომსახურების დეპარტამენტის ახალციხის სერვისცენტრის უფროსი ემზარ ევსტაფიშვილი, სსიპ სამცხე-ჯავახეთის სასწავლო უნივერსიტეტის პედაგოგი ვლადიმერ ზედგინიძე და სსიპ ეროვნული სატყეო სამსახურის სამცხე-ჯავახეთის სატყეო სამსახურის ანალიტიკოსი ელენე გოგოლაძე.

[sknews.ge]