სამცხე-ჯავახეთის გუბერნიაში კადრების შესარჩევი გასაუბრება განახლდა

ამჯერად გასაუბრებას ის კონკურსანტები გაივლიან, რომლებსაც განაცხადი რეგიონული პროექტების კოორდინირების სამსახურის უფროსის მოადგილის, რეგიონული პროექტების კოორდინირების სამსახურის მთავარი სპეციალისტისა და უფროსი სპეციალისტის ვაკანსიაზე ჰქონდათ შეტანილი.

აღნიშნული პოზიციებზე გასაუბრება 25 კონკურსანტს უნდა გაევლო, თუმცა, როგორც სამხარეო ადმინისტრაციაში განმარტავენ, კომისიასთან მხოლოდ 13 აპლიკანტი გამოცხადდა.

სამცხე-ჯავახეთის სახელმწიფო რწმუნებულის-გუბერნატორის აპარატის უფროსის გიორგი მიქელაძის თქმით, რეგიონული პროექტების კოორდინირების სამსახურის უფროსის მოადგილის პოზიციაზე პირველი ეტაპი 8 კონკურსანტმა გადალახა, ამავე სამსახურის მთავარი სპეციალისტის პოზიციაზე გასაუბრებას ერთი კონკურსანტი გაივლის, რაც შეეხება ორი უფროსი სპეციალისტის პოზიციას, აქ გასაუბრებას 16 აპლიკანტი გაივლის.

ხვალ, 23 აპრილს, გასაუბრებას ის კონკურსანტები გაივლიან, რომელთაც განაცხადი რეგიონული პროექტების კოორდინირების სამსახურის სპეციალისტის პოზიციაზე აქვთ შეტანილი.

შეგახსენებთ, კონკურსის მეორე ტური, გასაუბრებები 14 აპრილს დაიწყო. პირველ დღეს გასაუბრება იმ კონკურსანტებმა გაიარეს, რომელთაც განაცხადი სახელმწიფო რწმუნებულის-გუბერნატორის აპარატის მთავარი სპეციალისტისა და სპეციალისტის ვაკანსიაზე ჰქონდათ შეტანილი. მთავარი სპეციალისტის ვაკანსიაზე 7, სპეციალისტი ვაკანსიაზე კი 22 კანდიდატი იყო, ამათგან გასაუბრებაზე მხოლოდ 18 აპლიკანტი გამოცხადდა.

15 აპრილს კი გასაუბრება სახელმწიფო რწმუნებულის-გუბერნატორის აპარატში საქმისწარმოებისა და იურიდიული საკითხების სპეციალისტების ვაკანსიაზე ჩატარდა. საქმისწარმოების პოზიციაზე 19, იურისტის ვაკანსიაზე კი 13 განაცხადი იყო შესული. 32 კონკურსანტიდან გასაუბრებაზე 12 არ გამოცხადდა.

16 აპრილს გასაუბრება იმ კონკურსანტებმა გაიარეს, ვისაც განაცხადი ადგილობრივი თვითმმართველობის ორგანოებთან ურთიერთობის სამსახურის უფროსისა და ამავე სამსახურის უფროსის მოადგილის ვაკანსიაზე ჰქონდათ შეტანილი. 24 აპლიკანტიდან გასაუბრებაზე 8 არ გამოცხადდა.

17 აპრილს სამცხე-ჯავახეთის გუბერნაიში ადგილობრივი თვითმმართველობის ორგანოებთან ურთიერთობის სამსახურის ორი უფროსი სპეციალისტი შეარჩიეს. გასაუბრებაზე 39 კონკურსანტიდან 14 არ გამოცხადდა.

[მანანა სარაშვილი, ახალციხე]