როდის გაირკვევა რამდენი გაივლის გასაუბრებას 378 აპლიკანტიდან?

სამცხე-ჯავახეთის გუბერნიაში შექმნილ საკონკურსო-საატესტაციო კომისიაში განმარტავენ, რომ მოხელეთა შესარჩევი კონკურსი ორ ეტაპად უნდა ჩატარდეს. პირველი ეტაპი, რომელიც საბუთების გადარჩევას გულისხმობს, მიმდინარე კვირაში გაიმართება.

აპლიკაციებს ხუთკაციანი კომისია გადაარჩევს. კომისიის თავმჯდომარე სახელმწიფო რწმუნებული-გუბერნატორი აკაკი მაჭუტაძეა, მოადგილე კი მისი, როგორც გუბერნატორის, პირველი მოადგილე ავთანდილ კაჭკაჭაშვილი. კომისიის წევრები არიან შემოსავლების სამსახურის მომსახურების დეპარტამენტის ახალციხის სერვისცენტრის უფროსი ემზარ ევსტაფიშვილი, სსიპ სამცხე-ჯავახეთის სასწავლო უნივერსიტეტის პედაგოგი ვლადიმერ ზედგინიძე და სსიპ ეროვნული სატყეო სამსახურის სამცხე-ჯავახეთის სატყეო სამსახურის ანალიტიკოსი ელენე გოგოლაძე.

სახელმწიფო რწმუნებულის-გუბერნატორის აპარატის უფროსის გიორგი მიქელაძის თქმით, როდის განიხილავს კომისია კონკურსანტების საბუთებს, ზუსტი დრო ჯერ უცნობია: „ძალიან ბევრი განაცხადია შემოსული, ამიტომ პირველი ეტაპის ჩატარებას სავარაუდოდ ერთი კვირა დაჭირდება“.

მისივე განმარტებით, აპლიკაციების გადარჩევის შემდეგ დაინიშნება გასაუბრების ვადები: „პირველ ეტაპის ჩატარების შემდეგ გახდება ცნობილი რომელ პოზიციაზე, როდის ჩატარდება გასაუბრება“.

შეგახსენებთ, რომ სამხარეო ადმინისტრაციაში მოხელეთა შესარჩევი კონკურსი 18 მარტს გამოცხადდა. ამ კონკურსის შედეგად, ადმინისტრაციაში უნდა დაკომპლექტდეს სახელმწიფო რწმუნებულის-გუბერნატორის აპარატი და სამი სამსახური: ადგილობრივი თვითმმართველობის ორგანოებთან ურთიერთობის, რეგიონული პროექტების კოორდინირებისა და საგანგებო სიტუაციების. გარდა ამისა შეირჩევა გუბერნატორის მდივან-რეფერანტი.

სამცხე-ჯავახეთის გუბერნიაში საბუთების მიღება 27 მარტს დასრულდა. 25 ვაკანსიაზე 378 განაცხადი შევიდა. ადმინისტრაციის აპარატში განმარტავენ, რომ ყველაზე მოთხოვნადი საგანაგებო-სიტუაციების მართვის სამსახური და გუბერნატორის მდივნის პოსტია.
საგანგებო სიტუიაციების მართვის სამსახურში 9 ვაკანტური პოსტია და ჯამში 53 განაცხადია შესული. 35 აპლიკაცია შევიდა მდივან-რეფერენტის პოზიციაზე.

[მანანა სარაშვილი, ახალციხე]