სამცხე-ჯავახეთის გუბერნიაში გასაუბრებაზე დღეს 14 კონკურსანტი არ გამოცხადდა

სამცხე-ჯავახეთის გუბერნიაში ადგილობრივი თვითმმართველობის ორგანოებთან ურთიერთობის სამსახურის ორი უფროსი სპეციალისტი უნდა შეარჩიონ. დღეს გამართულ გასაუბრებაზე 39 კონკურსანტიდან 14 არ გამოცხადდა.

შეგახსენებთ, კონკურსის მეორე ტური, გასაუბრებები, გუბერნიაში 14 აპრილს დაიწყო. პირველ დღეს გასაუბრება იმ კონკურსანტებმა გაიარეს, რომელთაც განაცხადი სახელმწიფო რწმუნებულის-გუბერნატორის აპარატის მთავარი სპეციალისტისა და სპეციალისტის ვაკანსიაზე ჰქონდათ შეტანილი. მთავარი სპეციალისტის ვაკანსიაზე 7, სპეციალისტის ვაკანსიაზე კი 22 კანდიდატი იყო, ამთგან გასაუბრებაზე მხოლოდ 18 აპლიკანტი გამოცხადდა.

15 აპრილს კი გასაუბრება სახელმწიფო რწმუნებულის-გუბერნატორის აპარატში საქმისწარმოებისა და იურიდიული საკითხების სპეციალისტების ვაკანსიაზე ჩატარდა. საქმის მწარმოებლის პოზიციაზე 19, იურისტის ვაკანსიაზე კი 13 განაცხადი იყო შესული. 32 კონკურსანტიდან გასაუბრებაზე 12 არ გამოცხადდა.

16 აპრილს გასაუბრება იმ კონკურსანტებმა გაიარეს, ვისაც განაცხადი ადგილობირვი თვითმმართველობის ორგანოებთან ურთიერთობის სამსახურის უფროსისა და ამავე სამსახურის უფროსის მოადგილის ვაკანსიაზე ჰქონდათ შეტანილი. 24 აპლიკანტიდან გასაუბრებაზე 8 არ გამოცხადდა.

სამცხე-ჯავახეთის სამხარეო ადმინისტრაციაში კონკურსანტებთან გასაუბრება მომავალი კვირიდან გაგრძელდება. 22 აპრილს გასაუბრება რეგიონული პროექტების კოორდინირების სამსახურის უფროსის მოადგილის, მთავარი სპეციალისტისა და უფროსი სპეციალისტის ვაკანსიებზე ჩატარდება.

[თამარ თოთაძე, ახალციხე]