სამცხე-ჯავახეთის რწმუნებულის ადმინისტრაცია 2 ვაკანტურ პოზიციაზე თანამშრომელს შეარჩევს

რწმუნებულის ადმინისტრაციაში საზოგადოებასთან ურთიერთობის სპეციალისტის ვაკანტურ პოზიციაზე 14 განაცხადი შევიდა, ხოლო რეგიონული პროექტების კოორდინირების სამსახურის უფროსი სპეციალისტის (საინჟინრო საქმე) პოზიციაზე - ცხრა.

როგორც რწმუნებულის აპარატში განმარტავენ, საჯარო მოხელის შერჩევის მეორე ეტაპი, იგივე გასაუბრება, ხვალ, 26 ივნისს 12:00 საათიდან დაიწყება.

„კანდიდატები გასაუბრებას გაივლიან საკონკურსო კომისიასთან, რომელშიც ექვსი წევრია. გასაუბრების შემდეგ, კომისია მიიღებს კანდიდატის აყვანის გადაწყვეტილებას“, - ამბობს სამცხე-ჯავახეთის სახელმწიფო რწმუნებულის აპარატის უფროსი გიორგი მიქელაძე.

ორ ვაკანტურ პოზიციაზე სამხარეო ადმინისტრაციამ ღია კონკურსი ოთხ ივნისს გამოაცხადა. შერჩეულ აპლიკანტებს 12–თვიანი გამოსაცდელი ვადით აიყვანენ.

[თაკო ფეიქრიშვილი, ახალციხე]